ئەو دوو تیرۆریستەی چەند رۆژێک لەمەوبەر لەلایەن هێزە ئەمنیەکانی عێراقەوە دەستگیرکران، وردەکارییەکانی پیلانی هێرشکردنە سەر دوو یانەی دانیمارک و هۆڵەندا لە مۆندیاڵی 2010ی ئەمساڵ کە لە ئەفریقیا بەڕێوە دەچێت، ئاشکرا کرد.
عەبدولڵه عزام ێالح القوتانی کە رەگەزنامەی سعودیایی هەیە رایگەیاند کە لە ساڵی 2004 هاتۆتە نێو عێراق بۆ شەڕکردن لەدژی ئەمریکیەکان و سەر بە رێکخراوی ئەلقاعیدەوە بووە.
بەرپرسێکی ئەمنی عێراقی رایگەیاند، کە دەستگیرکردنی ئەلقوتانی دوای ئۆپەراسیۆنێکی هاوبەشی ئەمریکی-عێراقی بۆ کوشتنی دوو سەرکردەی ئەو رێکخراوە لە عێراق هات کە ئەبو ئەیوب میسری و ئەبو عومەر بەغدادی بوون.
ئەو بەڵگەنامانەی کە لە شوێنی کوژرانی هەردوو سەرکردەی ئەلقاعیدە دۆزراونەتەوە یەکێکیان لەلایەن ئەلقوتانیەوە نووسراوە تێیدا باسی پلانێک بۆ هێرشکردنە سەر مۆندیالی 2010ی ئەمساڵ کراوە.
لەو بەڵگەنامەیەدا هاتووە کە بۆ تۆڵەسەندنەوە لەو سووکاتیانەی کە لەلایەن دانیمارک و هۆڵەندا لەسەر پێغەمبەری ئیسلام حەزرەتی محەمەد(د.خ) لەسەربێت، کراوە، بۆیە بڕیار دراوە بە هێرشکردنە سەر هەردوو یانەی دانیمارک و هۆڵەندا. هەروەها لە نووسراوەکەدا هاتووە کە لەکاتی سەرنەکەوتنی هێرشکردن بۆ سەر یانەکانی هۆلەندا و دانیمارک، لەوکاتەدا هێرش دەکرێتە سەر بینەران و لایەنگرانی هەردوو یانەکەی لەنێو یاریگادا.