بابه‌ت: یاساكانی نوێی ئه‌كادیمیای ئۆسكار راگه‌یه‌ندران
یاساكانی نوێی ئه‌كادیمیای ئۆسكار راگه‌یه‌ندران
Peyamner PNA – ئه‌كادیمیای ئۆسكار رۆژی رابردوو به شێوه‌ی فه‌رمی له بڵاوكراوه‌یه‌كدا، یاساكانی نوێی ئه‌و ئه‌كادیمیایه‌ی له بواری كاندید بوون له خوله‌كانی داهاتووی ئه‌و خه‌ڵاته راگه‌یاند.
به گوێره‌ی هه‌واڵی "هۆلیوود ریپۆرته‌ر"، له ئاكامی په‌ره‌سه‌ندنی به‌كارهێنانی كاریگه‌رییه تایبه‌تییه‌كان له فیلمه‌كانی هۆلیوودی، ئه‌كادیمیای ئۆسكار برِیاری داوه، ژماره‌ی فیلمه كاندید كراوه‌كان بۆ به‌شی كاریگه‌رییه تایبه‌تیه‌كان له سێ فیلم بگۆرِێت بۆ پێنج فیلم.
هه‌موو ساڵێك سێ فیلم له به‌شی كاریگه‌رییه تایبه‌تییه‌كان بۆ به‌ده‌ست هێنانی خه‌ڵاتی باشترین كاریگه‌ری تایبه‌تی كاندید ده‌كران، به‌ڵام ئه‌كادیمیای ئۆسكار له ئاكامی زیادبوونی به‌كارهێنانی ئه‌و ته‌كنیكه له فیلمه هۆلیوودییه‌كان، برِیاری داوه ژماره‌ی كاندیده‌كانی ئه‌و به‌شه بۆ پێنج كاندید زیاد بكات.
به پێی یاساكانی نوێی ئه‌كادیمیای ئۆسكار كه رۆژی رابردوو بڵاو كراونه‌ته‌وه، ئه‌مساڵ گۆرِانكاری له دوو به‌شی ئۆسكاری كاریگه‌رییه تایبه‌تییه‌كان و ئۆسكاری باشترین فیلمی ئه‌نیمه‌یشن دێته ئاراوه.
به پێی ئه‌و یاسایانه، له‌مه‌ودوا ئه‌و ئه‌نیمه‌یشنانه ده‌توانن به‌شداری له به‌شی ئۆسكاری باشترین ئه‌نیمه‌یشن بكه‌ن كه زیاتر له (40) خوله‌ك و كه‌متر له (70) خوله‌ك بن. هه‌روه‌ها به پێی یاساكانی نوێ ده‌رهێنه‌ران له فیلمه‌كانی سینه‌مایی خۆیان ده‌توانن كه‌ڵك له ئه‌نیمه‌یشن وه‌ربگرن، به‌ڵام نابێت به كارهێنانی ئه‌و ته‌كنیكه له (75%)ی ماوه‌ی فیلمه‌كه كه‌متر بێت.
هه‌شتا و سێیه‌مین خولی خه‌ڵاته‌كانی ئۆسكار (27)ی شوبات له هۆڵی كۆداك تیه‌تری شاری لۆس ئه‌نجلێس به‌رِێوه ده‌چێت