(PNA)- له‌ئێستادا به‌شی سێیه‌می زنجیره‌ درامای "گه‌رده‌لوول" له‌ ناوچه‌ی گه‌رمیان كاری وێنه‌گرینی بۆ ده‌كرێت، تا ئێستاش زیاتر له‌ نیوه‌ی دیمه‌نه‌كانی وێنه‌گیراوه‌.
ده‌رهێنه‌ری زنجیره‌ درامای گه‌رده‌لوول جه‌لیل زه‌نگه‌نه‌ له‌لێدوانێكی تایبه‌ت بۆ ئاژانسی په‌یامنێر گوتی "كاری وێنه‌گرنی زنجیره‌ درامای گه‌رده‌لوول نزیك بۆته‌وه‌ له‌ %٦٠، ئێستاش له‌ ده‌وورووبه‌ری ناوچه‌ی گه‌رمیانیان كاری وێنه‌گرتنی بۆ ده‌كرێت، دواتریش ده‌گه‌رِێنه‌وه‌ ناو شارو ره‌نگه‌ سه‌ره‌تا دیمه‌نه‌كانیش له‌ زانكۆوه‌ ده‌ست پێبكاته‌وه‌".

گوتیشی "ئێمه‌ 14 مانگمان دانابوو بۆ وێنه‌گرتنی دراماكه‌، به‌ڵام به‌هۆی ئه‌وه‌ی زۆر به‌ جوانی و له‌سه‌ر خۆی كارده‌كه‌ین و هه‌ندێك جاریش گیروگرفتمان بۆ دروست ده‌بێت، له‌وانه‌ كێشه‌ی ئۆتۆمبێل و نه‌خۆشكه‌وتنی ئه‌كته‌ر، ئه‌مانه‌ هۆكارێكن بۆئه‌وه‌ی هه‌ندێكجار كاری وێنه‌گرتنه‌كه‌ له‌سه‌ر خۆ بڕوات".

ئاماژه‌ی بۆ ئه‌وه‌شكرد "جارێ ناتوانین پێشبینی ئه‌وه‌ بكه‌ین كه‌ی ئه‌م درامایه‌ ده‌خرێته‌ به‌رچاوی بینه‌ر، به‌ڵام دوای دوو مانگی دیكه‌ ده‌توانین ئاماژه‌ بۆ ئه‌وه‌ بكه‌ین".

به‌شی سێیه‌می زنجیره‌ درامای "گه‌رده‌لوول" باس له‌ ساڵانی 1978- 1983 له‌ كوردستان ده‌كات، له‌گه‌ڵ ئه‌وه‌ی چه‌ند ئه‌كته‌رێكی سه‌ره‌كی به‌شی دووه‌م به‌شدار نین و ئه‌مجاره‌یان چه‌ند ئه‌كته‌رێكی سه‌ره‌كی نوێ ده‌رده‌كه‌ون.

به‌پێێ زانیارییه‌كان له‌م به‌شدا نزیكه‌ی ١٠٠٠ كه‌س وه‌ك كۆمبارس و ئه‌كته‌ر له‌ رۆڵی دووه‌مدا له‌م درامایه‌ به‌شدارن.

ئه‌م درامایه‌ به‌هۆی سه‌رنجڕاكێشی و رووداوه‌كانی، بۆته‌ یه‌كێك له‌و درامایانه‌ی خه‌ڵكی چاوه‌ڕێی بینینی ده‌كه‌ن.