بابه‌ت: یانه‌ی هه‌ولێر له مالیزیا ئوردوگایه‌كی مه‌شقی ئه‌نجام ده‌دات
به مه‌به‌ستی ئه‌نجامدانی ئۆردوگایه‌كی مه‌شقی، شه‌وی یه‌كشه‌ممه له رێگه‌ی فرۆكه‌خانه‌ی هه‌ولێری نێوده‌وڵه‌تی شاندی یانه‌ی هه‌ولێر به‌ره‌و وڵاتی مالیزیا به‌رِێكه‌وت.
بێجان ئیبراهیم سه‌رۆكی شاندی یانه‌ی هه‌ولێر له لێدوانێكی تایبه‌ت به ئاژانسی (په‌یامنێر) گوتی: شه‌وی یه‌كشه‌ممه به‌ره‌و شاری كوالامپور به‌رێده‌كه‌وین به مه‌به‌ستی ئه‌نجامدانی ئۆردوگایه‌كی مه‌شقی بۆ ماوه‌ی پێنج رۆژ له‌م ئۆردوگایه یه‌ك یاری دۆستانه ئه‌نجام ده‌دین له‌گه‌ڵ یه‌كێك له یانه‌كانی مالیزیا، دواتر روو له وڵاتی ئه‌نده‌نووسیا ده‌كه‌ین بۆ ئه‌وه‌ی له 13ی ئه‌م مانگه رووبه‌روو یانه‌ی پرسیبۆرا جایابۆرای ئه‌ندنووسی ببینه‌وه.
له درێژه‌ی قسه‌كانیدا بێجان ئیبراهیم گوتی: چه‌ند یاریزانێك به‌هۆی په‌یوه‌ندی كردنیان به هه‌ڵبژارده‌ی عێراق له‌گه‌ڵ شاندی یانه‌كه‌مان سه‌فه‌ر ناكه‌ن، دوای ته‌واوبوونی یارییه‌كی هه‌ڵبژارده‌ی عێراق و سه‌نگافوره یاریزانه‌كانی یانه‌ی هه‌ولێر راسته‌وخۆ په‌یوه‌ندی به یانه‌ی هه‌ولێر ده‌كه‌ن له مالیزیا و ئێمه پشت به‌م ئۆردوگا مه‌شقیه ده‌بستین بۆ ئه‌وه‌ی تیپه‌كه‌مان به باشترین شێوه خۆی بۆ یارییه‌كانی قۆناغی هه‌شته‌می جامی یه‌كێتی ئاسیا بۆ تۆپی پێی ئاماده بكات.
جێگه‌ی باسه له 13ی ئه‌م مانگه له وڵاتی ئه‌ندنوسیا هه‌ردوو یانه‌ی هه‌ولێر و پرسیبۆرا جایابۆرا ئه‌ندنووسی رووبه‌رووی یه‌كتر ده‌بنه‌وه و له 27ی هه‌مان مانگ له یاریگه‌ی شه‌هید فرانسۆ هه‌ریری هه‌ردوو یانه دووباره رووبه‌رووی یه‌كتر ده‌بنه‌وه
س.ياريگا
