كچە قوتابییەكی زانكۆ لەشاری دهۆك، كە تەمەنی 20 ساڵەو هێشتا كچە و لەماڵی باوكی دەژیێت، لەناكاو خێزانەكەی ئاگادار دەكاتەوە، كە ئەو وەك مەریەمی پاكیزە بەرۆحی پیرۆز دووگیان بووەو بۆ ئازار پێنەگەیشتنی منداڵەكەی ناوسكیشی، "وەك خۆی بڕوای وایە"، شەوانە لەترسی ئەندامانی خێزانەكەی بەتەنها لەژوورێك دەنوێت و دەرگا لەسەر خۆی قوفڵ دەدات، ماوەی چەند رۆژێكیش ناچێتە كۆلێژ، نەوەك كچە قوتابییەكانی هاوڕێی ئێرەیی پێببەن و زیان بەكۆرپەكەی ناوسكی بگەیەنن!.

ئەو كچە قوتابییە بەئاین مەسیحییەی شاری دهۆك، ماوەیەكی زۆر لەلایەن كەسوكارەكەی ئامۆژگاری دەكرێت، بەوەی كە ئەو لەخەیاڵ دەژیت و ئەو قسانەی دەیانكات، هیچ راستییەكیان بۆ نییە، چونكە وەك بنەماڵەكەشی گوتیان، مەریەمەی پیرۆز جارێكی دیكە دووبارە نابێتەوە. بەڵام كچەكە تاچەند رۆژێكیش پێی وادەبێت كە دەوروبەر و خێزانەكەی هەموو بەهەڵەدا چوونەو ئەوەی ئەو دەیڵێ، "راستییەكی حاشا هەڵنەگرە". وەك كەسوكارەكەی هێماشی بۆ دەكەن، ئەنورتا لەدوای ئەوەی توشی ئەو حالەتە دەبێت، خۆی لەئەندامانی بنەماڵەكەی بەدوور دەگرێت و هیچكات لەماڵەوە رێگا نادات كەسیان لێی نزیك بكەونەوەو پێیاندەڵێ، ئەو مەریەمی پاكیزەیەو ئەوەشی كە لەناو سكی دایە مەسیحی پیرۆزە لەكاتێكدا ئەو سكیشی نەبووە، بەڵام واگومانی بردووە، وەك كەسێكی بنەماڵەكەیان كە نەیویست ئاماژە بەناوەكەی بكرێت، گوتی "شەوان كاتێك ئەنورتا دەخەوت، دەرگاكەی لەسەر خۆی قوفڵ دەدا، لەترسی ئەوەی یەكێ لەئێمە سكەكەی لەبار بچوێنێت و رۆحی پیرۆز لەناو سكی دەربكات!".

ئەو كچە قوتابییەی زانكۆ، بەدرێژایی ئەو ماوەیەی حالەتەكە "نەخۆشی شیزۆفرینیا (الفصام العقلی)"، بەقورسی دەگرێت، ناچێتە دەوامی كۆلێژ، كە وەك یەكێ لەهاوڕێكانی هێمای بۆ دەكات، ئەنورتا كچێكی هێمن و بێكێشە بووەو ئەوانیش پێیان سەیربووە كە توشی حالەتەكە هاتووە. بەدرێژایی ئەو ماوەیەش، ئەنورتا لەماڵەوە هەمیشە خەریكی گفتوگۆ بووە بۆ باوەڕهێنان بەخانەوادەكەی كە ئەو مەریەمی پاكیزەیەو بەمەسیحی پیرۆز دووگیانە. لەدواجاریشدا خێزانەكەی دەتوانن بڕوا بەكچەكەیان بهێنن كە سەردانێكی پزیشكی دەروونی بكات و حالەتەكەی خۆی لەزاری دكتۆری تایبەتمەندەوە بزانێت و ئەگەر دكتۆرەكە گەیشتە ئەو باوەڕەی كە ئەو مەریەمی پاكیزەیە، ئەوە ئەوانیش وەكو بنەماڵە، ئامادەن هەموو ئەو قسانەی ئەو دەیكات، بیسەلمێنن.

ئەنورتا، رازی دەبێت كە سەردانی پزیشكی دەروونی بكات، بەڵام لەسەرەتادا ئەو هەر مكوڕ دەبێت لەسەر قسەكانی خۆی و هەموو ئامۆژگارییەكانی دكتۆریشی لا خەیاڵ و قسەی پڕوپوچ دەبێت و تەنها خۆی بەراست دەزانێت. هەر بۆیە ئەو رۆژەی كە دەچێتە لای دكتۆر، ئەنورتا بەدكتۆرە دەروونییەكە دەڵێ ئەندامانی خێزانەكەم كەسیان ئامادەنین كە دان بەو راستییەدا بنێن، كە من مەریەمی پاكیزەم، بەڵام دكتۆر دڵنیام كە تۆ تێمدەگەی و بڕوا بەقسەكانم دەكەیت؟.

دكتۆر (سالم ئەلحەكیم) پسپۆڕ لەبواری دەروونزانی، لەبارەی نەخۆشییەكەی (ئەنورتا) و یەكەم دیداریان بۆ (سڤیل)، هێمای بەوەكردو گوتی كە "ئەو رۆژەی ئەنورتا هات، منیش پێمگوت كە ئەو قسانەی ئەو دەیانكات جگە لەخەیاڵی پوچ و بێبنەما هیچی دیكە نییە"، دكتۆر (سالم ئەلحەكیم) دەڵێت "ئەنورتا كە زانی منیش بۆی ناسەلمێنم، كە ئەو قسانەی ئەو دەیانكات راستن، یەكسەر لێم توڕەبوو و گوتی پێناچێ ئەو كتێبانەی كە تۆ خوێندووتە هیچیان سوودیان بۆت هەبووبێت، چونكە من دڵنیام تۆ هەڵەیی و من راستم".

وەك ئەو دكتۆرە تایبەتمەندەی بواری دەروونزانی هێمای بۆ دەكات، ئەو كچەی شاری دهۆك، مانگێ لەمەوبەر لەناكاو توشی نەخۆشی شیزۆفرینیا (الفصام العقلی) دەبێت، كە وەك ئەو لەبارەی ئەوجۆرە نەخۆشییە دەڵێت "زۆربەی جاران ئەو كەسەی كە توشی نەخۆشی شیزۆفرینیا دەبێت، لەرووی ئاینی و سیاسی دەكەوێتە ژێر كاریگەری و هەر بۆیەش كاتێك ئەنورتا توشی نەخۆشییەكە دەبێت، دەكەوێتە ژێر كاریگەری مەریەمی پاكیزە و وادەزانێت وەكو ئەوی لێهاتووەو بەرۆحی پیرۆز دووگیان بووە".

لەبارەی جۆری نەخۆشییەكەش وەك ئەو دكتۆرە هێمای بۆ دەكات، نەخۆشی شیزۆفرینیا (الفصام العقلی) نەخۆشییەكی عەقڵییەو بەزۆر شێوە توشی مرۆڤ دەبێت. دەڵێت "لەهەر كۆمەڵگایەك شیمانەی ئەوە دەكرێت، كە لەهەر 100 كەس 1 كەس توشی نەخۆشییەكە ببێت، هەموو كەسێك و لەهەر جۆرە تەمەنێكیش بێت، جا منداڵ یان گەنج و پیر بێت، ئامادەگی توشبوونی بەنەخۆشییەكەی هەیە"، بەڵام دەشڵێت كە "ئەگەر بەتەمەنی گەورە توش هاتی باشترە لەوەی كە بەمنداڵی توش بێیت، چونكە لەمنداڵی توش بێیت، كاریگەری بەسەر گەنجێتی و پیرێتیش دەبێت"، هاوكات دكتۆر سالم ئەلحەكیم پسپۆڕ لەبواری دەروونزانی، ئەوەشی گوت كە "لەكاتی توشبوون بەنەخۆشییەكە، ئافرەت لەپیاو زووتر چارەسەری وەردەگرێت و دەگەڕێتەوە دۆخی ئاسایی خۆی".

لەدوای یەكەمین دیداری نێوان ئەنورتا و پزیشكە دەروونییەكە، دواجار هاواركردنی كچەكە بەسەر دكتۆردا، بەڵێن بەیەكتری دەدەن كە چەند جارێكی دیكەش بەیەكەوە دابنیشنەوە و گفتوگۆ لەبارەی ئەو بابەتەوە بكەن. بەوجۆرە دكتۆرەكە هاوكات لەگەڵ دانیشتن و گفتوگۆی بەردەوامیان لەگەڵ ئەنورتا، چەندین جۆر داودەرمانیش وەك چارەسەرییەك بۆ نەخۆشییەكەی، دەكاتە مەرجی بەردەوامی دانیشتنەكان، كە دەبێت ئەنورتا دەرمانەكان بخوا و بەكاریان بهێنێت.
دكتۆر (سالم ئەلحەكیم) دەڵێت "من بەردەوام ئەوەم بەئەنورتا دەگوت، كە خەیاڵ و نەخۆشییەكەی ئەو، وەك ئەوەیە كەوا كەلووە بەفرێك بخەیتە ناو پەرداخێك ئاو و بەفرەكە بتوێتەوە، ئاوا خەیاڵاتی ئەویش كەمێك باشتر دەبێت، بەڵام ئەگەر ئاوی ناو پەرداخەكەش گەرم بوو و بووە هەڵم و هیچ لەناو پەرداخەكە نەما، ئەوكاتە نەخۆشییەكەی ئەنورتاش بنەبڕ دەبێت و هیچ خەیاڵێكی ناخۆش لەناو مێشكی نامێنێت".

ئەو دكتۆرە پسپۆڕە گەڕایەوە سەرباسكردنی جۆری نەخۆشییەكەو گوتیشی "ئەگەر باوك یان دایك، یەكێكیان توشی ئەو نەخۆشییە هات، ئەوا مەترسی بەرێژەی لە 10% هەیە كە منداڵەكانیشیان توشی نەخۆشییەكە ببن، بەڵام ئەگەر دایك و باوك هەردووكیان نەخۆشییەكەیان هەبوو بێت، ئەوا بەرێژەی 50% مەترسی هەیە كە نەخۆشییەكە بۆ منداڵەكانیشیان بگوازرێتەوە، ئەگەر منداڵی دووانەش (جمك) یەكێكیان توش هات، ئەوەی دیكەش بە 67% مەترسی توشبوونی هەیە"، ئەو دكتۆرە ئەوەشی گوت كە "هەردوو رەگەزی نێرومێ وەكو یەك مەترسی توشبوونیان بەنەخۆشییەكە هەیە، بەڵام پیاو لەتەمەنی زۆر زوو مەترسی توشبوون بەنەخۆشییەكەی هەیەو شانسی ژنانیش لەزووتر چاكبوونەوە لەپیاوان زیاترە".

دكتۆر (سالم ئەلحەكیم) لەبارەی سەرئەنجامی هەوڵەكانیشی لەگەڵ ئەنورتا، هێمای بەوەكرد كە لەدوای چەندین دانیشتن و گفتوگۆی چڕوپڕی نێوانیان، هاوكات لەگەڵ بەكارهێنانی داودەرمانەكان، دوای ماوەیەك نەخۆشەكە روو لەچاكبوونەوە دەكات، دەڵێت "بەردەوام نەخۆشییەكەی ئەنورتام بەراورد دەكرد بەتاوانەوەی كەلووە بەفرەكەی ناو پەرداخە ئاوەكە، ئەنورتاش زۆر دڵی بەو لێكچوواندنە خۆشبوو"، دەشڵێت "پاش ئەوەی ئەنورتا بەتەواوی لەنەخۆشییەكە دەربازی بوو و چاكبۆوە، زۆر پەشیمان بوو لەقسەكانی خۆی و دەیگوت، چۆن من خۆم بەمەریەمی پاكیزە بەروارد كردووە؟

کوردکلیک