مۆمێکی تری ته‌مه‌نم داگرساند و
هه‌ردیار نه‌بوویت !
تا لێم بپرسی : بۆ وا ماتی ؟!
نه‌ با هه‌واڵی تۆی پێبوو
نه‌ له‌گه‌ڵ بارانا هاتی
وه‌ک کۆچه‌ری ده‌وار به‌کۆڵ
هه‌ر گه‌رمیان و کوێستان ئه‌که‌م
ئای له‌ خه‌می بێ وڵاتی !!
                   *********
ده‌ وه‌ره ‌وه ..خۆ تا ئێستا
سه‌فه‌رێکم نه‌ ها‌ته‌ به‌ر‌
کۆچه‌که‌ی به‌ره‌و ژوور نه‌بێ
بمتوانیایه‌..رێگاکانم ئه‌پێچایه‌وه‌
هه‌ربۆئه‌وه‌ی
ماوه‌ی نێوانمان دوور نه‌بێ !
              *********
ده‌ وه‌ره‌ وه‌ ...
گه‌ر ئه‌م جاره‌ ویستت برۆی
ویستت ته‌نها جێم بهێڵیت
بمکوژه‌ ئه‌وسا جێم بێڵه‌ !
با زریانیش
لاشه‌م له‌گه‌ڵ خۆی راپێچی
بڵێی کوژراو گوێ بداته‌
سه‌رماو باران و ره‌هێڵه‌

فةرةيدون صلاح