ه‌ یه‌كێك له‌ زانكۆكانی كۆڵۆمبیا خوێندكارێك پاش ئه‌وه‌ی ئاماده‌ی وانه‌ی بیركاری بوو، زۆرماندووبوو، هه‌ربۆیه‌ له‌ كۆتایی هۆڵه‌كه‌دا دانیشت‌و به‌ هێمنییه‌كه‌وه‌ خه‌و بردییه‌وه‌!
پاش ته‌واو بوونی وانه‌كه‌ به‌ ده‌نگی قوتابیه‌كان وه‌خه‌به‌ر هات، سه‌یری بۆرده‌كه‌ی كرد بینی مامۆستا دوو پرسیاری له‌سه‌ر نووسیوه‌، به‌خێرایی هه‌ردوو پرسیاره‌كه‌ی نووسییه‌وه‌‌و له‌ هۆڵه‌كه‌ چووه‌ ده‌ره‌وه‌، گه‌ڕایه‌وه‌ بۆ ماڵه‌وه‌ ده‌ستی كرد به‌ بیركردنه‌وه‌ له‌ شیكاری پرسیاره‌كان، به‌ڵام پرسیاره‌كان زۆر ئه‌سته‌م بوون هه‌ر له‌به‌رئه‌وه‌ چووه‌ كتێبخانه‌ی زانكۆكه‌و كتێبی پێویست‌و تایبه‌ت به‌ وانه‌كه‌ی وه‌رگرت...
پاش چوار رۆژ هه‌وڵ‌و ماندووبوون توانی پرسیاری یه‌كه‌میان شیكار بكات، له‌ دڵی خۆیدا زۆر تووڕه‌ بوو له‌ مامۆستاكه‌ به‌ هۆی پێدانی پرسیاری گرانی له‌و جۆره‌وه‌!!
بۆ وانه‌ی داهاتووی بیركاری خوێندكاره‌كه‌ سه‌ری سوڕما له‌وه‌ی كه‌ بۆ مامۆستاكه‌ داوای وه‌ڵامی پرسیاره‌كان ناكات!!
چوو بۆلای‌و پێی وت: دكتۆر ته‌نها بۆ شیكاری پرسیاری یه‌كه‌م چوار رۆژی خایاندو له‌ چوار په‌ڕه‌شدا شیكارم كردووه‌..
مامۆستاكه‌ سه‌ری سوڕما له‌ خوێندكاره‌كه‌‌و پێی وت: به‌ڵام من هیچ ئه‌ركێكم به‌ ئێوه‌ نه‌داوه‌!!
ئه‌و دوو پرسیاره‌ش كه‌ نووسیبوم له‌سه‌ر بۆرده‌كه‌ ئه‌وه‌ نموونه‌ی ئه‌و پرسیارانه‌ بوون كه‌ تا ئێستاش زانست ده‌سته‌وسانه‌ له‌ شیكاركردنیان!!
واته‌ ته‌نانه‌ت زاناكانیش نه‌یانتووانیوه‌ شیكاری بكه‌ن!!
ئه‌وه‌ش قه‌ناعه‌تێكی نه‌رێییه‌ وای له‌ زاناكانیش كردووه‌ ته‌نانه‌ت بیر له‌ هه‌وڵا دان بۆ شیكاری ئه‌و پرسیارانه‌ نه‌كه‌نه‌وه‌...
ئه‌گه‌ر ئه‌و خوێندكاره‌ به‌خه‌به‌ربووایه‌ له‌ كاتی باس كردنی ئه‌و نموونانه‌ گوێی له‌ وته‌ی مامۆستاكه‌ بووایه‌، بێگومان ئه‌ویش بیری له‌ شیكاریان نه‌ده‌كرده‌وه‌...
هه‌تا ئێسته‌ش وه‌ڵامی ئه‌و پرسیارانه‌ به‌ هه‌ر چوار په‌ڕه‌كه‌وه‌ له‌و زانكۆیه‌ نمایش ده‌كرێت‌و ماوه‌.
له‌م به‌سه‌ر هاته‌وه‌ ئه‌وه‌مان بۆ روون ده‌بێته‌وه‌ كه‌ له‌ ژیانی رۆژانه‌ی هه‌موو یه‌كێكماندا چه‌ند بیركردنه‌وه‌یه‌كی نه‌رێی كه‌ به‌ مێشكماندا دێن ده‌یانكه‌ینه‌ (مه‌شخه‌ڵ بۆ شكست)..
زۆرجار وشه‌ی ناتوانم، مه‌حاڵه‌، گرانه‌،...هتد، ده‌بیستین، ئه‌وانه‌ش هیچ نین بێجگه‌ له‌ بیركردنه‌وه‌ی نه‌رێنی چه‌وت كه‌ هیچ راستییه‌ك نییه‌ لێیانه‌وه‌.
زۆرجار هه‌ر به‌و بیركردنه‌وانه‌ به‌رنامه‌ڕێژی له‌ هزر‌و مێشكماندا ده‌چه‌سپێنین‌و له‌ داهاتووشدا به‌ هه‌مان شێوه‌ی بیركردنه‌وه‌كانمان ئه‌نجامی به‌رنامه‌ڕێژییه‌كه‌ ده‌بینین‌و دووچاری ئه‌و رووداوانه‌ ده‌بین كه‌ كردبوومانه‌ ته‌وه‌ری بیركردنه‌وه‌كانمان...
گومانی تێدا نییه‌ كه‌ هه‌ركاتێك سه‌رده‌خه‌ینه‌ سه‌ر سه‌رین چه‌ندین خه‌یاڵا‌و بیركردنه‌وه‌ به‌ مێشكماندا دێت، مه‌رج نییه‌ ئه‌و بیركردنه‌وانه‌ باش‌و ئه‌رێنی بن، هه‌ربۆیه‌ كاتی پێش خه‌وتن بۆ بیركردنه‌وه‌ی نه‌رێنی به‌كارناهێنین...
كه‌واته‌ پێویسته‌ هه‌ستین به‌ دانانی به‌رنامه‌ی باش‌و داڕشتنی بیری باش له‌ مێشكماندا به‌وه‌ی كه‌ ئێمه‌ی مرۆڤ خوای گه‌وره‌ گه‌وره‌ترین نیعمه‌تی پێ به‌خشیوین كه‌ له‌ ڕێیه‌وه‌ ده‌رك به‌ شته‌كان ده‌كه‌ین‌و ده‌توانین به‌ دوای هۆكار‌و چاره‌سه‌ره‌كاندا بڕۆین‌و ده‌سته‌وسان نه‌بین له‌ به‌رامبه‌ر شه‌پۆله‌كانی بیركردنه‌وه‌ چه‌وته‌كانمان‌و به‌رگری بكه‌ین‌و به‌ویست‌و هیممه‌تی به‌رزه‌وه‌ ئه‌و قه‌ناعه‌تانه‌ بشكێنین‌و به‌ره‌و لوتكه‌ هه‌نگاو بنێین...

مرۆڤی پشت به‌ستوو به‌خوای گه‌وره‌‌و گرتنه‌به‌ری هۆكاره‌كان ده‌توانێت به‌ ئاسانی ده‌ست به‌رداری بیركردنه‌وه‌ی هه‌ڵه‌ ببێت‌و به‌رده‌وام بیركردنه‌وه‌ ئه‌رێنییه‌كانمان بخه‌ینه‌گه‌ڕ، ئه‌و كات به‌ ئاسانی ده‌توانین وه‌ڵامی هه‌موو پرسیاره‌ ئه‌سته‌مه‌كان بده‌ینه‌وه‌!

ئاماده‌کردنی: ســایه‌ فارس

له‌ گۆڤاری بڕیار بڵاو کراوه‌ته‌وه‌

دەڵێن شێت بووە ،دەست و پێی کۆت و بەند کەن!
دەڵێم: دڵ شێت بووە
دەست و پێ چ بکا؟!