[size=24]نهێنییەکانی چات[/size]

پڕۆژەیەکی تەمەن چوارساڵەیە کە ئامۆژگاری ئامێز و جەنگێکە بۆ نوێژەن کردنەوەی دیوارە درز تێبووەکانی کۆمەڵ! وەجیاوازیشە چونکە لێرە بیرەوەری گێڕانەوەی ڕابوردوو نییە! بەڵکوو داهاتووە! خۆ ئامادە کردنێکە بۆ بەڵایەک کە بەڕێگەوەیە! دەزانم وشەی بەڵا تۆقێنەرە! بەڵام گەر ئامێری تەلەفۆنی مۆبایل لەماوەی 10 ساڵ هۆکار و ڤاکتەر بووبێ بۆ ئەوەی هەزاران تاوان ڕوبدات بەتایبەتی دژی ڕەگەزی مێ لە نێوان کوشتن و ئازار و تەڵاق و کێشەی زۆری کۆمەڵایەتی کە سەرەتاکەی بەساویلکەیی و عەوداڵ بوون بۆ ئاشکرا کردنی جیهانی بەرامبەر و ڕاکردن لە دەست پاڵەپەستۆی داب و نریت بەخۆی و گشت پاوانەکانییەوە خولقانویەتی وە کۆتاییەکەی بەڕێگایەکی تاریکی پڕ لەتاوان بوو! ئەوە گەر خزمەتگوزاری ئەنتەرنێت بەو هەرزانی و کوالیتێتەی مۆبایل بکەوێتە بەردەستی هەموو خەڵک ئەوە دڵنیام ئەو دەساڵە کورت دەکاتەوە بۆ ساڵێک گەر مانگێکیش نەبێ! چونکە نێت لەناو ماڵەکانماندایە و زۆر جار ژوری نوستن! هەر بۆیە ناوی "بەڵا"ــم لێناوە!
گەر خێزانە کوردەکان وریای ئەم کێشەیە نەبن ئەوە کوڕەکەیان یان کچەکەیان لە خودی ژورەوە دەستی ناپاکیان پێدەگات چ وەک ئابڕو بردنی یان نەخۆش خستنی(ئالودە) درکم بەو مەترسییە بێ ئەوەی درکی ئەوەم هەبێ توشی چی دەبم! دەستم پێکرد و بەردەوامیش دەبم بە گەیاندنی ئەو پەیامەی مەبەستمە گشت تاکی کورد پێی بگات!
کچ و کوڕ و دایک و باوک ، دنیای ئەنتەرنێت وەک دارستان وایە هەرچۆن درەخت و سەوزایی و گوڵ و پەپولەی تێدایە ئاواش پڕە لەدڕندەی ئابڕو بەر کە بەبەرگی کاریزمەییەوە نێچیرەکانی ڕاودەکات بەرگی شاعیرێکی هەست ناسک و نوسەرێکی لێهاتوو هونەرمەدێکی دەنگ خۆش و کورێکی قسە خۆش و سیاسییەکی کارامە هتد، ڕەنگە کارێکی پڕ لەمەترسی و سەرکێشی بێت نوسەرێک بچێتە مەیدانێک بجەنگێ بەرامبەر کەسانێک بەتاڵ بن لە فکر و ڕۆشنبیری و تاقە چەکیان نێرایەتی بێت! بێ لە نامەسئولییەتیان و بێ ئەزمونی چ لە تەمەن کە زۆرینەیان گەنجن چ وەک ڕەفتاری عەقڵانی و ڕەوشتی! هەڵبەت کاردانەوەی هەیە و دەشیبێت لەداهاتوودا! وە باجەکەشی قورسە و دانی حەتمییە کە خودی خۆم(نوسەر) وەک ئەوکچانە وکوڕانەی سوکایەتیان پێکرا سوکایەتیش بەخۆم کرا! بێ لە هێرشی هاک و تێکدانی کۆمپیتەر و زیانی ئابوری!
شاردنەوەی ژیانی تایبەتم لە زۆر شوێن کە پێویست دەکات خوێنەر بمناسێ کێم و چیم کردووە و چی دەکەم یەکێکە لەوباجانە کە پارێزراو بم بۆیە نامۆ هەردەم وەک نامۆ ناسراوەو هیچی تر! ئەم دژایەتی کردنەش چەند جۆرێکە! جۆرێک ئەوانەن کە ڕاستەوخۆ پڕۆژەکەم پەردەی لەسەر ڕوخساریان هەڵماڵێ! وە جۆرەکەی تریش ئەوانەن ئەو تاوانانەی باسم کردووە لە کەسایەتی خۆیاندا بەدی دەکەن ! گەر کەسێکی تریش ئەنجامی دابێ! ئیتر لەنێوان ئەم و ئەودا کۆمەڵێک خەڵکی ساویلکە تێدەکەون و مەقاش ئاسا بەکاردێن وەک ئەوانەی چ وەک هەڵوێست یان بەنوسینی بێ سەرەو بەرە دژی پڕۆژەکە وەستان! بەدڵنیایشەوە دەڵێم هەردوو لا لە پەیامی من تێنەگەشتوون! کە ئاساییە مرۆڤ هەڵە بکات بەڵام ئاسایی نییە بەردەوام بێت! هەمووشتێ لەم دنیایەدا بۆ باش و خراپ بەکار دێت وەک (چەقۆ) بۆ کار ئاسانی ژیانمان بەکاری دێنین و هەشە بۆ تاوانی کوشتن بەکاری دێنێ! من لێرە باسی خراپەکان دەکەم کە وەک نوسەرێک ئەرکی سەرشانمە تۆش ئەوەت لەسەرە خراپەکان بکەیت بە ئەزمونێک کە تۆ لایەنە باشەکەی بیت! قورس نییە تێگەشتنی وایە؟ هەڵبەت بابەتێکی گەورەیە بە نوکە قەڵەمێک کۆتایی نایەت!.

نووسینی: نامــۆ