بابه‌ت: من و تۆ
من و تۆ
[imgl]http://kurdistannet.org/foto_nuser/Hemeseid%20Hesen.jpg[/imgl]
ئه‌وه‌نده له یه‌كدی ده‌چین
قه‌ت نه‌ده‌بوو
له نێو دوو جه‌سته‌دا بژین،
هه‌مان پێشینه‌مان هه‌یه
چاو له هه‌مان ئاسۆ ده‌بڕین،
ڕێبواری هه‌مان شه‌قامین
به هه‌مان په‌یام سه‌رسامین،
هۆگری هه‌مان دیمه‌ن و
هه‌مان ڕه‌نگین،
تامه‌زرۆی هه‌مان ئاواز و
هه‌مان ده‌نگین،
په‌روه‌رده‌ی یه‌ك خاك و ئاوین
به یه‌ك خولیا گۆش كراوین،
به هه‌مان باده سه‌رخۆشین
هه‌مان پێكی خه‌م ده‌نۆشین،
به هه‌مان ئاگر سووتاوین
گرفتاری هه‌مان داوین،
قاڵبووی هه‌مان بۆته‌ی ئێشین
تا ئاستی شێتیی سه‌ركێشین،
كه ده‌په‌یڤین
قسه‌ی یه‌كدی ده‌ڵێینه‌وه
كه پێك ده‌گه‌ین
له یه‌كدیدا ده‌توێینه‌وه،
ئێمه دوو باڵی مه‌لێكین
ئێمه دوو دێوی كه‌لێكین، *
تۆ ئه‌وه‌نده له من ده‌چی
من ئه‌وه‌نده له تۆ ده‌چم
گه‌لێ جار له خۆم ده‌پرسم،
تۆ بڵێی ئه‌من، ئه‌و نه‌بم؟
حمه‌سه‌عید حه‌سه‌ن
15-10-2003
_____________________
* كه‌ل: كه‌ژ، چیا، شاخ، كێو.
به‌كاریگه‌رییه‌تیی گۆرانیی ((شایف البحر))ی "فه‌یرووز" نوسراوه.
