بابه‌ت: حه‌وت مانگ ده‌خه‌وێت‌و سێ رۆژیش به‌خه‌به‌ره
كچێكی ته‌مه‌ن 24 ساڵانی جه‌زائیری له‌حاڵه‌تێكی زۆر تایبه‌تی ده‌ژی كه ته‌نانه‌ت پزیشكه‌كانیش نه‌یانتوانیوه له‌و حاڵه‌ته تێبگه‌ن، به‌شێوه‌یه‌ك ئه‌و كچه به‌به‌رده‌وامی‌‌و بێ پچڕان 7 مانگ به‌بێ خواردن‌و خواردنه‌وه ده‌خه‌وێت‌و ته‌نها بۆماوه‌ی 3 رۆژیش به‌خه‌به‌ر دێته‌وه‌‌و دواتر ده‌گه‌ڕێته‌وه بۆ سه‌ر خه‌وتنه‌كه‌ی.
حاڵه‌تی خه‌وی به‌رده‌وای ئه‌و كچه جه‌زائیرییه كه ناوی «نه‌بیله«یه له‌ژوورێكی تاریكدا به‌جۆرێك له‌خه‌یاڵ دێته پێش چاو كه بۆماوه‌ی سێ ساڵه تووشی بووه.
دایكی «نه‌بیله« له‌باره‌ی حاڵه‌تی كچه‌كه‌وه باس له‌وه ده‌كات كه هه‌رچه‌نده كچه‌كه‌ی هیچ گرنگییه‌كی بۆ خواردن نییه، به‌ڵام خۆی خواردنی ده‌داتێ‌‌و یارمه‌تیده‌دات له گواستنه‌وه‌ی‌‌و پاك كردنه‌وه‌یدا هه‌موو ئه‌مانه‌ش له‌كاتێكدایه كه ئه‌و كچه خه‌وتووه‌‌و ته‌واو بێئاگایه. له‌هه‌مووشی سه‌یرتر ئه‌وه‌یه كه نه‌بیله بۆماوه‌ی 13 ساڵه هیچ قسه‌یه‌كی نه‌كردووه، ئه‌مه‌ش دوای ئه‌وه‌ی كه زۆر له‌ناكاو ئه‌و كچه خۆی له‌ئه‌ندامانی خێزانه‌كه‌ی گۆشه‌گیر كردووه‌‌و دابڕاوه له‌هه‌ر په‌یوه‌ندییه‌كی ده‌ره‌كی.
دایكی نه‌بیله، له‌چاوپێكه‌وتنێكیدا له‌گه‌ڵ كه‌ناڵی mbc ئاماژه‌ی به‌سه‌ر سووڕمانی خۆی كردووه له‌و خه‌وه قووڵه‌ی كچه‌كه‌ی كه بۆماوه‌ی چه‌ند مانگێك ده‌خایه‌نێت به‌بێئه‌وه‌ی هیچ خواردنێك بخوات یان هیچ گفتوگۆیه‌ك له‌گه‌ڵ ئه‌ندامانی خێزانه‌كه‌یدا بكات.
دایكی نه‌بیله رایگه‌یاندووه كه هه‌ندێكجار هه‌ست ده‌كات ئازارێك له‌سه‌ری كچه‌كه‌یدا هه‌یه به‌بێئه‌وه‌ی هۆكاره‌كه‌ی بزانێت.
هه‌رچه‌نده دكتۆره پسپۆڕه‌كان نه‌یانتوانیوه له شیكردنه‌وه‌ی حاڵه‌تی خه‌وتنی به‌رده‌وامی ئه‌و كچه‌و هۆكاره‌كانی، به‌ڵام رایده‌گه‌یه‌نن كه ئه‌وه حاڵه‌تێكی بۆماوه‌ییه به‌شێوه‌یه‌ك كه نه‌نكی نه‌بیله‌ش بۆماوه‌ی 3 مانگ‌و به به‌رده‌وامی خه‌وتووه.
به‌ڕای ئه‌و دكتۆرانه پێده‌چێت هۆكاری ئه‌و حاڵه‌ته بگه‌ڕێته‌وه بۆ بوونی گرفتێك له له‌كۆئه‌ندامی ده‌مارییدا به‌تایبه‌ت له‌ناوه‌ندی خه‌وتن له‌مۆخدا، چونكه به‌پێی زانست هیچ كه‌سێك ناتوانێت زیاتر له 48 كاتژمێر بخه‌وێت به‌بێ خواردن‌و خواردنه‌وه كه له‌شی مرۆڤ پێویستییه‌تی‌‌و به‌بێئه‌وه‌ش ژیانی مرۆڤ كۆتایی دێت.
