بابه‌ت: تۆ له‌كام جۆری...؟!؟!؟!
لە گەڵ پەیدابوونی سەدان جۆر ئۆتۆمبێلی نوێ وسەیروسەمەردا، شۆفێرەكانیشمان داهێنانیان لە لێخوڕیندا كرد، ژمارەی بریندارو وەفات لە شەڕی ئوحود زۆرتر نەبێ كەمتر نیە، خوا ڕەحمی بە گەلی كورد كرد هێشتا نەبۆتە خاوەن فڕۆكەی تایبەت، ئەگینا ئاسمان یەك پارچە دەبووە ئاگروئاسن و ڕۆژانە لە جیاتی باران،پەروانەو باڵ و تایەو ودەرگاو بورغی و ونەفەر دەبارین! ئێستا كامیرای شاراوەو وئاشكراش بە ناچاری گۆڕانیان بە سەر كاری خۆیان هێناوە، چۆن،،،،لە ڕێگەیەكدا نووسراوە، ئاگاداربە جادەكە بە كامیرا كۆنترۆل كراوە، .بەڵام دەبینی لەو سەری جادە پۆلیسێكی هاتوچۆ كامیرایەكی سێ پایی كە بە كامیرای شەمسی دەچێت لەناو جەزرەی وەسەتی داناوەو ڕاستەوخۆ ڕووداوەكانی شۆفێرەكان دەگوازێتەوە،
بۆ زانین وناسینەوەی هەندێك لە شۆفێرە تازەگەرەكانمان من ناچارم پۆلێنێكیان بكەم وەكو هاوكاریيەك بۆ كاری مروور ..ئێمە لە هەموو دنیا جۆری ئۆتۆمبێل وجۆری شۆفێرمان زۆرترە كە گرنگترینیان ئەمانەن:
1- شۆفێری گەردوونی،ئەو شۆفێرەیە باوەڕی بە ئیشارەو عەلامەی گەردوونی هەیە،بە تەنیشتدا وەكو فڕۆكەی شەبەح تێپەڕ دەبێ،لە كوێوە هات چۆن ڕۆیی ئەوە عیلمی غەیبەو كەس نایزانێ!
2- شۆفێری بە تەمای خوا،،،ئەو شۆفێرە جەربەزەیەیە كە هێشتا نازانێ لێخوڕى و بەردەبێتە نێو جادەو كۆڵانەكان،چاكترین سیفەتی ئەم شۆفێرە بەڕێزە ئەوەیە لە تەنگانەدا لە جیاتی پێ بە ستۆپەوە بنێ، پێ بە بەنزیندا دەنێ وقەپاتی دەكات!
3- شۆفێری مورتاح، ئەو شۆفێرەیە لە ڕێگا دوورو نزیكەكان وا دەزانێ حكوومەت جادەی بە تایبەتی بۆ ئەو دروست كردوو، لە سەرخۆ نە بای دێ و نەشەماڵ،جاری وا هەیە سێ چوار ئۆتۆمبێل لە تەنیشتی پێش و پاشی ئەو لێك دەدەن، هەروا دەزانێ مێشوولەش ميوانی نیە!
4- شۆفێری ئاهەنگساز،،ئەو شۆفێرەیە حەز دەكات هەمیشە ئۆتۆمبێلەكەی وەكو هۆڵێكی ئاهەنگ وابێت، پڕ بێ لە نەفەرو هەموو چەپڵە لێدەن وگۆرانی و شایی بڵێنەوەو بۆ كوێ دەچێ،كاری چیە، مەگەر بەس خوا بیزانێ،
5- شۆفێری بە ناز پەروەردە، ئەو شۆفێرەیە هەستی زوو بریندار دەبێت،لە ڕێگەدا گەر تێپەڕت كرد ئەو بە ئیهانەیەكی گەورەی دادەنێ .بۆیە مۆڕەیەكت لێ دەكات، تێپەڕت دەكا، عەرەب گوتەنی چاو بە چاوو ددان بە ددان،
6- شۆفێری فیرار، ئەو شۆفێرەیە سوێندی خواردووە نەچێتە بەڕێوەبەرایەتی پۆلیس بۆ مۆڵەت، بۆیە هەر شۆفێرێك بە ئەنقەستیش خۆی پێدا بكێشێت، یەكسەر ئەملاو ئەولای ماچ دەكاو مەسرەفی چاك كردنەوەی پێ دەبەخشێ،
7- شۆفێری ئینتیحاری،،ئەمەیان زۆر مەترسیدارە، چونكە لە پڕێكدا وڕێگات لێ دەگرێ و لە نێو ئاپۆڕەی جادەكاندا زیك زاك دەكاو دەڵێی شۆفێری ئەتاریە!
8- شۆفێری ئارایشگا..ئەو شۆفێرەیە بە دەیان گڵۆپی ڕەنگاو ڕەنگ وبلاجیكتۆرو شریتی ئاگرو مارو بزن و حەسوود لا یەسوودو ڕیمولسەحرای لە ئۆتۆمبێلەكەی داوە .لە دوورەوە بە سەحنول تائیر دەچێت!
ئەمانە هەموویان ئاسایین، بەڵام ئەوەی ئاسایی نيیە چۆن ئەم هەموو جۆرانە لە جادەدا لە گەڵ یەك دەحەوێنەوە ؟ دەبێ ئەم پرسیارە لەو پۆلیسەی هاتوچۆ بكەین كە لە نێو كەپرێكی كۆنكریت موسەللەح وداخكراو لە گەرما دانیشتوەو مووچەیەكی مەمرەو مەژی وەردەگرێ و گەرما ئەوەندەی لێ داوە ڕەش هەڵگەڕاوەو شین بە سپی دەبینێ و شەش بە یەك دەخوێنێتەوە.
