(ئاكانیوز)- بەڕێوەبەری لێژنەی كێبەركێكان لە یەكەتیی تۆپی پێی عێراق رای گەیاند، لێژنەكە سێشەمی داهاتووی دیاری كردووە بۆ بەڕێوە چوونی یارییە دواخراوەكانی قۆناخی دووەمی كۆمەڵەی باكور و باشووری خولی بژاردەی عێراق.
شەهاب ئەحمەد بەئاژانسی كوردستان بۆ دەنگوباس (ئاكانیوز)ى راگەیاند، ژمارەی یارییە دواخراوەكانی خولی بژاردەی عێراق 10 یارییە، 7 لەو یارییانە لە كۆمەڵەی باكورن و 3 یارییەكەی تریش لە كۆمەڵەی باشوورە.
زیاتر گوتی، دووشەمی داهاتوو (1ی ئاب/ئۆگستس) 4 یاریی كۆمەڵەی باكوور ئەنجام دەدرێ، هەولێر و سناعە لە یاریگەی سناعە رووبەڕوو دەبنەوە، لە یاریگەی سلێمانی یانەكانی پێشمەرگە و زاخۆ یاریی دەكەن، یانەی مووسڵیش دەبێتە مێوانی یانەی سامەڕا و یانەی شورتەش مێوانداری یانەی نەوت دەكات.
ئەحمەد گوتی، پێنجشەم 4ی ئاب/ئۆگستسی داهاتوو یانەی هەولێر مێوانداری یانەی كەرخ دەكات، دواتریش شەموو 6ی ئاب/ئۆگستسی داهاتوو یانەی هەولێر دەبێتە مێوانی یانەی رومادی، هەروەها یانەی دهۆك چوارشەم 10ی هەمان مانگ مێوانداری یانەی هەولێر دەكات.
زیاتر گوتی، یارییە دواخراوەكانی كۆمەڵەی باشوور دووشەمی داهاتوو (1ی ئاب/ئۆگستس) دەست پێ دەكات، یانەی قووە جەوییە مێوانداری یانەی نەجەف دەكات، بۆ رۆژی دواتر یانەی بەغدا مێوانداری یانەی زەوڕا دەكات و لە یاریگەی یانەی مەسافی یانەی خاوەن یاریگە مێوانداری یانەی قووە جەوییە دەكات.
یانەی هەولێر ئێستە بەكۆكردنەوەی 52 خاڵ لە ریزبەندی یەكەمی كۆمەڵەی باكورە و یانەی زەوڕاش بە 59 خاڵ لە ریزبەندی یەكەمی كۆمەڵەی باشووری خولی بژاردەی عێراقە.