[size=16]لەدوای ئەوەی كچێك لەلایەن كوڕێكەوە دووگیان دەكرێت، باوكی كچەكە هەردووكیان دەباتە چۆلی و دەیانكوژێت. دادگا بەبێ ئامادەبوونی تۆمەتبار بەرێوەچوو و كەسوكاری كچەش لەدادگا نكۆلیان لەوەكرد كە كوڕەكەی ئەوان ئەو كارەی كردبێت.
هەفتەی رابردوو لەدادگای تاوانەكانی دهۆك، كێشەی كوشتنی كچێك و كوڕێك هاتە بەرباس و كەسوكاری هەردوولاش لەدادگا ئامادە ببوون. وەكو كەسێكی نزیك لەرووداوەكە بۆ (سڤیل) ئاماژەی پێدا، لەدوای دووگیانیبوونی كچەكە و بەرزبوونەوەی سكی بەشێوەیەكی خێرا، باوكی بەكێشەكە دەزانێت و تەنها گومانیشی لەكوڕەكەی هاوسێیان دەبێت، بۆیە رۆژێكیان هەردووكیان دەخاتە سەیارە و دەیانبا لەچۆلی دەیانكوژێت. تاكە كەسێكیش كە شایەتحاڵی رووداوەكەیە، رۆژی دادگایەكە ئامادەبوو و بۆ دادوەر گوتی "باوكی كچەكە رۆژێكیان بەسەیارە هاتە لای من و گوتی لەگەڵم سواربە، بابچین ئەو كچ و كوڕە لەیەكتری مارەبكەین. منیش باوەڕم كرد و بەڕێكەوتین، بەڵام لەناكاو سەیارەكەی بردە سەر رێگای خۆڵ و كچە و كوڕەی بەپاڵ هێنایە خوارەوە و بردنی بۆ ناو چالاییەك و چەند گوللەیەكی پێوەنان و هەردووكیانی كوشت. لەدوای ئەوەش، لەچاڵەكە هاتە دەرەوە و بەمنی گوت بڕۆوە ماڵی ئێمە و ماڵی ئەو كوڕە ئاگادار بكەوە، كە هەردووكیانم لەسەر ناموس كوشتووە، ئەو چەند قسەیەی كرد و سواری سەیارەكەی بۆوە و رۆیشت".
چواركەس لەخانەوادەی كوڕە كوژراوەكە، لەدادگا ئامادەبوون و زۆر بەتوندی ئەوەیان رەتدەكردەوە كەوا كوڕەكەی ئەوان كاری ئاوای كردبێت. هاوكات بۆ دادوەری دادگای تاوانان ئەوەشیان خستەروو كە رێی تێدەچێت تۆمەتبار قینێكی دیكەی بەرامبەر ئەوان هەبێت و بەو شێوەیە جێبەحێی كردبێت. ئەوەشیان گوت كە "لەوانەیە كچەكەی ئەو پیاوە لەلایەن كەسێكی دیكەوە سكی پڕ كرابێت و ئەویش ئەوەی قۆستبێتەوە تاوەكو كوڕەكەی ئەوان بكوژێت". هەر بۆیەش لەكۆتایی قسەكانیاندا دایك و باوكی كوڕەكە داوایان لەدادگا كرد، كەوا قەرەبوو بكرێنەوە و بكوژی كوڕەكەیان بەتوندترین شێوە سزا بدات، چونكە ئەوان تەنها ئەو كوڕەیان هەبووە. هەر لەرۆژی دادگاییەكە، دایك و خوشك و برای كچە كوژراوەكە لەدادگا ئامادەبوون و (خوشك و براكەی) داوایان لەدادوەر كرد كە بەتوندترین شێوە باوكیان سزا بدات، بەو هۆیەی بەبێ هیچ تاوانێك خوشكەكەیانی كوشتووە و پاشتر رایكردووە".
بەبێ ئامادەبوونی تۆمەتبار، دادگای تاوانان لەدهۆك بەپێی ماددەی 406 لەیاسای سزاكانی عێراقی، بەحوكمی زیندانیكردنی هەتاهەتایی، پیاوەكەی سزادا.

civil[/size]