سووده‌كانی زیكر كردن

سوودی یەكەم: زیكر كردن خوای پەروەردگار ڕازی دەكات لەو كەسەی كە هەڵ دەستێ‌ بە ئەنجام دانی.

سوودی دووەم: شەیتان سەركوت دەكا، و ڕاوی دەنا، و دەیڕفێنی، وەكو خوێندنی سورەتی (البقرة)، و بانگ دان، و جگە لەمانەش كە هۆی ڕاونا ن و دورخستنەوەی شەیتانن.

سوودی سێ‌یەم: هەم خەم و پەژارە، و ناڕەحەتیەكانی دڵ دەڕەوێنێتەوە، خۆشی و شادی توانا دەدات بە دڵ، هەروەكو خوای پەروەدگار فەرموویەتی: [ الَّذِينَ آمَنُواْ وَتَطْمَئِنُّ قُلُوبُهُم بِذِكْرِ اللّهِ أَلاَ بِذِكْرِ اللّهِ تَطْمَئِنُّ الْقُلُوبُ ] [ سورة الرعد: 28 ] .

سوودی چوارەم: دڵ و دەروون و لەش پتەو دەكات.

سوودی پێنجەم: دەم و چاو و ڕوومەت گەش دەكاتەوە، و نورانی دەكات.

سوودی شەشەم: وا دەكات لە موسڵمان ڕەقابەتی خوای لە لا پتەو بێت، تاكو دەگاتە پلەی پلەی (الإحسان)، ئەو كاتەش خوای خۆی دەپەرستێت وەكو ئەوەی كە بیبێنێت، بە پێچەوانەشەوە كەسێك كە بێ‌ ئاگا بێت لە یاد و زیكری خوا ناگاتە ئەو پلەیە.

سوودی حەوتەم: هۆكاری نزیك بوونەوەی موسڵمانانە لە خوای پەروەردگار، تاكو یاد و زیكری خوای زیاتر هەبێت زیاتر لە خوای پەروەردگار نزیك دەبێتەوە، وە بە پێەوانەشەوە پێچەوانە دەبێت، هەروەكو (أبو هریرە) رضي الله عنه هاوەڵی پێغەمبەری خوا صلى الله عليه وسلم لە پێغەمبەری خواوە صلى الله عليه وسلم بۆمان دەگێڕێتەوە، كە لە فەرموودەیەكی قودسیدا پێ‌ی ڕاگەیاندووین كە خوای پەروەردگار فەرموویەتی: " أَنَا عِنْدَ ظَنِّ عَبْدِي بِي، وَأَنَا مَعَهُ إِذَا ذَكَرَنِي، فَإِنْ ذَكَرَنِي فِى نَفْسِهِ ذَكَرْتُهُ فِى نَفْسِي، وَإِنْ ذَكَرَنِي فِى مَلأٍ ذَكَرْتُهُ فِى مَلأٍ خَيْرٍ مِنْهُمْ، وَإِنْ تَقَرَّبَ إِلَيَّ بِشِبْرٍ تَقَرَّبْتُ إِلَيْهِ ذِرَاعًا، وَإِنْ تَقَرَّبَ إِلَيَّ ذِرَاعًا تَقَرَّبْتُ إِلَيْهِ بَاعًا، وَإِنْ أَتَانِي يَمْشِي أَتَيْتُهُ هَرْوَلَةً "البخاري (8/171) [برقم (7405)] ، ومسلم (4/2061) [برقم (2675)] واللفظ للبخاري.
واتە: خوای پەروەردگار سەیری گومانی بەندەكەی دەكات بەرامبەر بەو، ئەگەر گومانی بە خوای خۆی چاك بوو ئەوا چاكەی لە گەڵ دەكات، و ئەگەر هەر گومانێكی تری هەبێت جگە لەوە، ئەوا ئەویش بەو پێیە دەبێت، پاشان خوای پەروەردگار دەڵێت: لە گەڵ بەندەكەم دەبم لەو كاتەی كە زیكرم دەكات، ئەگەر بەندە یادی خوا بكات لە نەفسی خۆیدا، خوای پەروەردگاریش لە نەفسی خۆیدا یادی ئەو دەكات، وە ئەگەر لە ناو كۆمەڵێكدا یادی كردم، لە كۆمەڵێكدا یادی دەكەم لەو كۆمەڵەی ئەو بەڕێز تر بن، كە كۆمەڵی فریشتەكانە، وە ئەگەر بستێك لێم نزیك بێتەوە، ئەوا باڵێك لێی نزیك دەبمەوە، وە ئەگەر باڵێك لێم نزیك بێتەوە، ئەوا ئەوەندەی هەردوو باڵ لێی نزیك دەبمەوە، وە ئەگەر بە ڕێكردن بێت بەرەو لام، ئەوا من بە هەروەلە دەچمە پیریەوە.

سوودی هەشتەم: دڵ پڕ دەكات لە لەخواترسان و بەگەورە دانانی لەبەر بەئاگا بوونی دڵ لێی، و لە یاد بوونی، بە پێچەوانەی بێ‌ ئاگا ترسان و هەیبەتی خوای لە دڵدا كەمە.

سوودی نۆیەم: بە زیكركردنی موسڵمان بۆ خوای پەروەردگار زیكری خوای پەروەردگار بە دەست دەهێنێت هەروەكو فەرموویەتی: [فَاذْكُرُونِي أَذْكُرْكُمْ ] ، ئەگەر زیكر كردن تەنها ئەم چاكەیەی هەبوایە ئەوا بەس بوو بۆ بەرزی پلە و ڕێزی لە لای خوای پەروەردگار.

سوودی دەیەم: ژیانی دڵ پەیوەستە بە زیكرەوە، هەروەكو پێشەوا (ابن القیم) لە مامۆستاكەیەوە شێخی پایە بەرزی ئیسلام (ابن تیمیە رحمه الله) دەگێڕێتەوە كە فەرموویەتی: ((الذكر للقلب مثل الماء للسمكة، فكيف يكون حال السمك إذا فارق الماء ؟!))الوابل الصيب - (ج 1 / ص 63). واتە: زیكر بۆ دڵا وەكو ئاوە بۆ ماسی، وەزع و حاڵی ماسی چۆن دەبێت ئەگەر لە ئاو ببڕێت ؟!