بابه‌ت: *ئه‌ترسم دڵ ببێته پارچه‌یه‌ک سه‌هۆڵ*
[size=16]ئه‌ترسم دڵ ببێته پارچه‌یه‌ک سه‌هۆڵ
تۆ خۆتم لێ مه‌شاره‌وه
ئه‌ترسم دڵ ببێته پارچه‌یه‌ک سه‌هۆڵ..
به‌ده‌م کزه‌ی ئێواره‌وه
***
تۆ خۆتم لێ مه‌شاره‌وه
من له گه‌ڵای زه‌ردی پایز..
زۆر بێ نه‌وا و غه‌ریبترم
له کزه‌با ته‌زیوترم
***
تۆ خۆتم لێ مه‌شاره‌وه
بیرته به زه‌رده‌ی ڕوانینه‌کانت..
هه‌ڵمت له به‌فری دڵم هه‌ڵسان و
منت خسته شوێن ساماڵی گیانت؟
***
تۆ خۆتم لێ مه‌شاره‌وه
بڕوانه په‌ڵه هه‌وره‌کان..
گەرچی نه‌دیده‌ن.. گەرچی نه‌ناسیاو..
دەست دەنێنە دەست
لە نیشتمانی ئاوارەیی‌دا..
ئەبن بە ڕێژنەی گریانێکی خەست
***
تۆ خۆتم لێ مه‌شاره‌وه
ئه‌ترسم دڵ ببێته پارچه‌یه‌ک سه‌هۆڵ..
به‌ده‌م کزه‌ی ئێواره‌وه
*****
محه‌مه‌د عومه‌ر عوسمان[/size]
