بابه‌ت: قه‌زافی ئازادانه له شه‌قامه‌كانی ئوردن ده‌سوڕێته‌وه
هیچ كه‌سێك باوه‌ڕ به چاوی خۆی ناكات كه ده‌بینێت قه‌زافی له‌شه‌قامه‌كانی ئوردن به ئازادانه ده‌سوڕێته‌وه و خه‌ڵكی له‌ده‌وری كۆبونه‌ته‌وه بۆ وێنه‌گرتن.
هاوڵاتیانی ئوردن له (عه‌مان) ی پایته‌ختی ئه‌و وڵاته له ده‌وری هاوڵاتیه‌كی (لیبی) گردبونه‌وه تا وێنه‌ی بگرن، چونكه ئه‌و پیاوه شێوه‌ی زۆر له موعه‌مه‌ر قه‌زافی سه‌رۆكی كوژراوی لیبیا ده‌چێت.
ئه‌و هاوڵاتیه لیبیه ناوی “زو حه‌قیق”ه به مه‌به‌ستی چاره‌سه‌ر سه‌ردانی ئوردنی كردوه، چونكه له شۆڕشی دژ به قه‌زافیدا به‌شداربوه، حه‌قیق له چاوپێكه‌وتنێكی له‌گه‌ڵ رۆژنامه‌ی “غه‌د”ی ئوردنی ئه‌مڕۆ شه‌ممه، رایگه‌یاند: “شێوه‌ی له قه‌زافی ده‌چێت و به‌وه‌ش هیچ دڵخۆش نیه”.
حه‌قیق جه‌ختی له‌وه‌ش كرده‌وه “له شێوه و روخساری خۆی رازی نییه، ئاماژه‌ی به‌وه‌شدا له سه‌روبه‌ندی شۆڕشی لیبیدا له‌كاتی هاتوچۆكردنی به شه‌قامه‌كانی لیبیادا هه‌میشه ده‌موچاوی خۆی هه‌ڵده‌پێكا، نه‌ك شۆڕشگێڕانی لیبیا وابزانن قه‌زافییه و بیكوژن.
حه‌قیق ڕوداوێكی پێكه‌نیناوی ده‌گێڕێته‌وه كه له عه‌مانی پایته‌ختی ئوردن به‌سه‌ریدا هاتوه، به‌وه‌ی له‌كاتی پیاسه‌كردنی له ناوچه‌یه‌كی ناوه‌ڕاستی شاردا، ئوردنییه‌كان بینیویانه چه‌نده له قه‌زافی ده‌چێت و به‌و هۆیه‌شه‌وه له ده‌وری گردبونه‌ته‌وه و وێنه‌یان له‌گه‌ڵ گرتوه، به‌م كاره‌شیان بواری هاتوچۆیان له شه‌قامه‌كه‌دا نه‌هێشتوه‌ته‌وه.
له نێو ئه‌و هوتافانه‌ی كه جه‌ماوه‌ری ده‌وری حه‌قیق وتویانه‌ته‌وه، ئه‌و قسانه‌ی قه‌زافی بون كه پێیان هه‌ڕه‌شه‌ی له شۆڕشی لیبی و شۆڕشگێڕانی ئه‌و وڵاته ده‌كرد “كۆڵان به كۆڵان، ماڵ به ماڵ” و “ئه‌وه‌ی ماڵی له شوشه بێت، به‌رد ناگرێته خه‌ڵكی” و چه‌ندین ده‌سته‌واژه‌ی تر.
حه‌قیق باسی ئه‌وه‌ش ده‌كات كه جارێكیان، پێش مردنی قه‌زافی، سه‌ردانی تونسی كردوه، پۆلیسی ئه‌و وڵاته‌ش چه‌ندین كاتژمێر له فڕۆكه‌خانه رایانگرتوه و به‌ته‌واوی پشكنیویانه، وایانزانیوه كه قه‌زافییه، ئاماژه‌ی به‌وه‌شكرد چه‌ندین چێشتخانه و شوێنی بازرگانی داوایان لێكردوه كاریان بۆ بكات، به‌مه‌به‌ستی سه‌رنجڕاكێشانی خه‌ڵكی، به‌ڵام ره‌تیكردوه‌ته‌وه.
DASTAN.SE
[/center]
