بابه‌ت: لۆس بلانکۆس بۆ قۆناغی هەشت و سیسکا مۆسکۆ بۆ ماڵەوە
لە دواین شەوی یارییەکانی قۆناغی ١٦ی خولی پاڵەوانەکاندا یانەی ڕیاڵ مەدرید میوانداری یانەی سیسکا مۆسکۆی ڕووسیکرد . لەو یارییە بە ئامادەبوونی نزیکەی ٨٠ هەزار هاندەر لەسەر یاریگای سانتیاگۆ بێرنابیۆ بەڕێوەچوو .
لە خاکی ڕووسیا هەردوویانە ١-١ بەرامبەربوون ، هەربۆیە ئەرکی هیچ لایەکیان لەم یارییەدا ئاسان نەبوو بە تایبەت یانەی میوان کە باش ئەو ڕاستییەی دەزانی سەرکەوتن لەم یارییەدا پێویستی بە موعجیزەیە . تییپەکەی مۆرینهۆش دەیانزانی هەر هەڵەیەک کارەساتی گەورەی لێدەکەوێتەوە و پێویستە بە ووردی یاری بکەن .
لە سەرەتا خولەکەکاندا یانەی میوان مەترسیدارتربوو دوو هێرشیان بردە سەر گۆڵی ئیکەر کاسیاس بەڵام بە تێپەڕبوونی کات مێرەنگی کۆنترۆڵی یاریگای گرتە دەست ، تاوەکو لە پاسێکی ڕیکاردۆ کاکا گۆنزالۆ هیگواین لە خولەکی ٢٦ گۆڵی پێشکەوتنی مەدریدی تۆمارکرد و نیوەی یەکەم بەو ئەنجامە بەکۆتاهات .
لە نیوەی دووەمدا ڕیاڵ بە تەواوی کۆنترۆڵی یاریگای کرد و شەپۆلێک هێرشیان بردە سەر گۆڵی یانە رووسییەکە تاوەکو لە موشەکێکی دوورهاوێژ کریستیانۆ ڕۆناڵدۆ لە خولەکی ٥٥ گۆڵی دووەمی تۆمارکرد کە ئەو گۆڵە دڵنیایی زیاتری بە هاندەران بەخشی .
دواتر لە خولەکی ٦٩ کەریم بنزیمە جێگای گۆنزالۆ هیگواینی گرتەوە و بە تێپەڕبوونی تەنیا ٢٩ چرکە بەنزیمە گۆڵی سێیەمی تۆمارکرد و دڵنیایی تەواوی بەخشییە تیپەکەی کە ئەو گۆڵەی بەنزیمە بووە خێراترین گۆڵ لە مێژووی خولی پاڵەوانەکاندا کە یاریزانێکی یەدەگ تۆماریکردبێت .
یارییەکە بەو ئەنجامە نەمایەوە و لە خولەکی ٧٧ تۆسیج بە لێدانێکی جوان تاکە گۆڵی یانەی میوانی لە یارییەکەدا تۆمارکرد . پاش ئەو گۆڵە ڕیاڵ پاشەکشەیکرد بەمەبەستی پارێزگاریکردن لە ئەنجامی یارییەکە هەربۆیە ئەنجامەکە بەو شێوەیە مایەوە تاوەکو دواین خولەکی کاتی زیادکراو و تێیدا لە پاسێکی جوانی کەریم بنزیمە کریستیانۆ ڕۆناڵدۆ گۆڵی چوارەمی یانەکە و دووەمی خۆی لە یارییەکەدا تۆمارکرد کە گۆڵی ژمارە ٦ بوو لە ٦ یاری خولی پاڵەوانەکان و ڕیاڵ بە ئاسانی گەیشتە قۆناغی داهاتوو .
ڕۆژی هەینی تیروپشکی قۆناغی چارەگی کۆتایی خولەکە ئەنجام دەدرێت .
Yariga
[/center]
