بابه‌ت: ده‌ستم كردووه به‌چوونه‌ده‌ره‌وه‌له‌گه‌ڵ ئافره‌تێكی ترجگه‌له‌خێزانم
ماوه‌یه‌كه ده‌ستم كردووه به چوونه ده‌ره‌وه له‌گه‌ڵ ئافره‌تێكی تر،جگه له خێزانم
هاوژین ڕه‌زا
دوای (21) ساڵ به‌سه‌ر ژنهێنانمدا، به بریسكه‌یه‌كی نوێ له خۆشه‌ویستی گه‌یشتم، ماوه‌یه‌كه ده‌ستم كردووه به چوونه ده‌ره‌وه له‌گه‌ڵ ئافره‌تێكی تر، جگه له خێزانم، هۆكه‌شی خێزانم بوو... ئه‌و ئافره‌ته‌ی یاد هێنامه‌وه و بیری خستمه‌وه‌گه‌ڕ تا په‌یوه‌ندیی پێوه بكه‌مه‌وه.
ئه‌ویش كاتێك كه خێزانم ده‌ستپێشخه‌ری كرد و وتی: "زۆر چاك ده‌زانم چه‌ندت خۆش ده‌وێت؟!"، ئه‌و ئافره‌ته‌ی كه خێزانم ده‌یویست له‌گه‌ڵیدا بچمه ده‌ره‌وه و كاتێكی له‌گه‌ڵ به‌سه‌ر به‌رم، دایكم بوو كه ده‌مێك بوو (له‌و كاته‌وه‌ی كه پێش (21) ساڵ ژنم هێنا) ئیتر له‌گه‌ڵیدا نه‌چووبوومه ده‌ره‌وه، به‌ڵێ سه‌رقاڵ بوونم به ئیش و ژیانی رۆژانه و سێ منداڵ و به‌رپرسیارێتیم له‌و ئه‌ركانه‌ی له ئه‌ستۆمدان ئه‌مانه هه‌مووی وایان لێكردبووم زۆر به ده‌گمه‌ن سه‌ردانی بكه‌م.
رۆژێكیان په‌یوه‌ندیم به دایكمه‌وه كرد و بانگم كرد بۆ ژه‌می ئێواره ئه‌ویش لێی پرسیم: "خێره كوڕم تۆ باشیت"؟
ده‌مزانی دایكم له ته‌له‌فۆنی ناوه‌خت تارادده‌یه‌ك ده‌ترسێت و بێ ئارامی و په‌شۆكاویی تووش ده‌بێت، بۆیه پێم وت: "به‌ڵێ من زۆر باشم دایه گیان، به‌ڵام ده‌مه‌وێت پێكه‌وه بچینه ده‌ره‌وه و نه‌ختێك له‌گه‌ڵتدا دابنیشم"، دایكیشم وتی: "هه‌رته‌نها هه‌ردووكمان؟"، تۆزێك بیری كرده‌وه و پاشان وتی: "به‌ڵێ زۆریش حه‌ز ده‌كه‌م".
رۆژی پێنچشه‌ممه و پاش ته‌واو بوون له كار، چووم بۆ لای و دایكمم له‌گه‌ڵ خۆم برد، تۆزێك شپرزه بووم، كاتێك گه‌یشتمه لای دایكم بینیم ئه‌ویش وه‌ك من شڵه‌ژاویی پێوه دیاره، دایكم له به‌ر ده‌رگا به عه‌زیزییه‌كی جوانه‌وه چاوه‌ڕێی ده‌كردم وا دیار بوو دواترین كراس بوو كه باوكم پێش وه‌فاتی بۆی كڕیبوو.
دایكم زه‌رده‌خه‌نه‌یه‌كی كرد و وتی: "له ماڵه‌وه به هه‌موویانم وتووه ئه‌مڕۆ له‌گه‌ڵ كوڕه‌كه‌مدا ده‌چمه ده‌ره‌وه، هه‌موویان دڵخۆش بوون، له خۆشیدا خه‌ریكه خۆیان پێ ناگیرێت تا بگه‌ڕێمه‌وه و ده‌نگوباسی ئه‌م شه‌ویان بۆ باسبكه‌م، ئیتر پێكه‌وه چووین بۆ چێشتخانه‌یه‌كی نائاسایی، به‌ڵام جوان و بێ ده‌نگ ... دایكیشم خان و مان و وه‌ك خاتوونی یه‌كه‌م ده‌ستی گرتبووم، پاش ئه‌وه‌ی دانیشتین من ده‌ستم كرد به خوێندنه‌وه‌ی لیستی جۆری خواردنه‌كان، چونكه دایكم ته‌نها پیته گه‌وره‌كانی بۆ ده‌خوێنرایه‌وه.
له‌م كاته‌دا كه من لیسته‌ی خواردنه‌كانم ده‌خوێنده‌وه دایكم زه‌رده‌خه‌نه‌یه‌كی گه‌وره له‌سه‌ر لێوه چرچ و لۆچه‌كانی بوو سه‌یری ده‌كردم و خوێندنه‌وه‌كه‌ی لێ بڕیم و وتی: "رۆژگارێك بوو تۆ پچكۆله بوویت من بۆ تۆم ده‌خوێنده‌وه".
وه‌ڵامم دایه‌وه: "ئیتر كاتی ئه‌وه هاتووه شتێك له‌و قه‌رزه‌ی له‌سه‌رمه بیده‌مه‌وه ... تۆ پشوو بده دایه گیان"، به ده‌م نانخواردنه‌وه زۆر قسه‌مان كرد و باسه‌كانمان زۆر ئاسایی بوون، باسی به‌سه‌رهاتی كۆن و تازه‌ی خۆمانمان ده‌كرد به‌شێوه‌یه‌ك هه‌تا دوای تێپه‌ڕبوونی نیوه‌شه‌و هه‌ستمان به كات نه‌كرد، كاتێك گه‌ڕاینه‌وه و دایكم گه‌یانده‌وه ماڵه‌وه له به‌رده‌رگادا دایكم وتی: "رازیم جارێكی تریش هه‌ر پێكه‌وه بچینه ده‌ره‌وه، به مه‌رجێك نانخواردنی جاری داهاتوو له‌سه‌ر من بێت"، منیش ده‌ستم ماچ كرد و به خوام سپارد.
پاش چه‌ند رۆژێكی كه‌م دایكم به سه‌كته‌ی دڵ وه‌فاتی كرد، ئه‌وه‌نده خێرا كۆچی كرد نه‌متوانی هیچ شتێكی بۆ بكه‌م.
چه‌ند رۆژێكی تری نه‌خایاند به به‌ریددا كاغه‌زێكم پێگه‌یشت له‌و چێشتخانه‌یه‌‌وه كه من و دایكم نانی شێوانمان لێخوارد به‌یه‌كه‌وه، له‌سه‌ر كاغه‌زه‌كه تێبینییه‌كی دایكمی له‌سه‌ر نووسرا بوو: "نرخی لیسته‌ی حسابه‌كه‌تان پێشه‌كی دراوه، چونكه ده‌مزانی جاری داهاتوو من له‌وێ نابم، گرنگ ئه‌وه‌یه پاره‌ی نانی شێوانم بۆ دوو كه‌س داوه بۆ تۆ و بۆ خێزانت، پێ ده‌چێت نه‌زانیت مانای ئه‌و شه‌وه به‌لای منه‌وه چه‌ندێك بوو... خۆشم ده‌وێیت كوڕی خۆم
ئه‌و ساته له شكۆمه‌ندی وشه‌ی (خۆشه‌ویستی) یان (خۆشم ده‌وێیت) تێگه‌یشتم، هه‌ر ئه‌و كاته‌ش له گه‌وره‌یی ئه‌و مانایه تێگه‌یشتم كه وابكه‌ین لای به‌رامبه‌ر هه‌ست به خۆشه‌ویستی و دۆستایه‌تیمان بكات.
------------------------
[/center]
