ئێستا من لە قوتابخانەی (SFI) ، زمانی سویدی دەخوێنم..
لە پۆلێکم کۆمەڵێک خوێندکارم لەگەڵدایە ، هەریەکێکمان لە شوێنێکەوە هاتووین ، بە شێوەیەک کە وڵات و زمان و کلتوری جیاواز کۆبوونەتەوە لە یەک ژووردا.
ئەمڕۆ لە کاتی وانە خوێندندا (جارێ لە سەرەتاداین) مامۆستاکەمان پیاوێکی سویدیە ، هەر قوتابیێک و کاغەزێکی نوسراوی بۆ هێناین کە تێیدا لە بەشی سەرەوەی کاغەزەکە کورتەیەک باسی وڵاتی سوید نوسرابوو.
لە خوارەوەش چەند پرسیارێک هەبوو ، بۆ وەڵامەکانیش بۆشایی جێهێشتبوو...
پرسیارەکان بریتیبوون لەوانەی خوارەوە..
١- ناوی وڵاتەکەت چییە؟
٢- لە کام کیشوەرە؟
٣- ژمارەی دانیشتوانی چەندە؟
٤- پایتەختەکەی کوێیە؟
٥- زمانەکەتان چییە؟
٦- ناوی تاڤگەکانی ئەگەر هەیەتی؟
٧- ناوی چیاکانی ئەگەر هەیەتی؟
٨- ناوی ڕوبارەکانی ئەگەر هەیەتی؟

منیش وەڵامەکانم بەم شێوەیە بۆ نوسی..
1-ناوی وڵاتەکەم (كــــوردستان)ـــە.
2-وڵاتی من لە کیشوەری ئاسیادایە
3-ژمارەی دانیشتوانی زیاتر لە ٥٠ ملیۆنە.
4-پایتەختەکەی ناوی (هەولێر)ە
5- ئێمە بە زمانی کوردی دەدوێین.
6-ناوی تاڤگەکانی ، بێخاڵ ، زەڵم ، گەلی عەلی بەگ ...هتد
7-کوردستان چیای زۆرە بۆ نمونە ، قەندیل ، مەتین ، زاگرۆس ، گاڕە ، گۆیژە ، سەفین ، هتد..
8-ڕوباری زۆری تێدایە .. سیروان ، ئەڵوەن ... هتد

دوای ئەوە یەك یەك کاغەزەکانی سەیر دەکرد ، هەموو خوێندکارەکان ناوی وڵاتەکانیان نوسیبوو لەسەر دیواری پۆلەکەشمان نەخشەیەکی زەوی هەیە کە تێیدا ناوی هەموو وڵاتەکان هەیە ، لەو کاتەدا بیرم لەوە کردەوە کاتێک سەرەی من هات با هەوڵ بدەم بە جۆرێك تێی بگەیەنم کە من خەڵکی کوردستانم بەڵام نەخشەی وڵاتەکەم لەسەر ئەو نەخشەیەدا نییە ، بۆیە خێرا لاپتۆپەکەی بەردەمم کردەوە و کرتەم کرد لەسەر ماڵپەڕی گوگڵ ، لەوێدا نوسیم

ئەوەبوو ئەو نەخشەیەم بینی کە هەمان نەخشە هاوپێچ دامناوە ،
دوایش وەك چاوەڕێم دەکرد وابوو ، مامۆستا هاتوو سەیری وەڵامەکانی کردم پاشان بە سەرسوڕمانەوە وتی: 50 ملیۆن؟؟!
وتم بەڵێ...
سەیرێکی نەخشەی سەر دیوارەکەی کرد وتی: کوا کامەیە کوردستان؟
منیش سەیرێکی شاشەی لاپتۆپەکەم کرد وتم لێرەوە جوانتر دیارە مامۆستا ئەوەتا سەیریکە..
ئەویش سەری نزیك کردەوە لە شاشەکەو نەخشەکەی بینی وتی: وڵاتێکی گەورەیە!
وتم: بە دڵنیاییەوە.
زۆر پێم خۆش بوو بتوانم زیاتر ڕوونکردنەوە بدەم لەسەر کوردستان بە گشتی و دابەش بوونی بە تایبەتی ، بەڵام بە داخەوە نە دەبوو لەوە زیاتر کاتی ئەوانیتر بگرم و زمانەکەش بە تەواوی نازانم.
لە دواییدا بیرم لەوە دەکردەوە ئەگەر گوگڵ نەبوایە لەو کاتەدا چۆن بمتوانیبا نەخشەیەکی وا جوان و ڕوون بخەمە بەر دیدەی مامۆستاکەم؟
بۆیە وتم (سوپاس گوگڵ سوپاس).

30/10/2012