بابه‌ت: نیه ڕه‌حمت
نیه ڕه‌حمت له ده‌رحه‌ق عاشقی شه‌یدایی میسکینت
بڵێ پێم توخودا کافر چی یه ؟ تۆ مه‌زهه‌بو دینت !
به خاکا پێ بنێ ، مه‌ینێ به دیده‌ی ئه‌شکبارمدا !
مه‌بادا دڕکی برژانگم بچێته پێی حه‌نایینت .
مه‌یێڵه ڕۆژی عاشق ڕه‌ش ببێ ئه‌ی یاری بێ مروه‌ت
له‌سه‌ر سوبحی جه‌بینت لاده جانا زوڵفی چین چینت
هه‌میشه لاله‌زاره ده‌وری قه‌برستانی عوششاقت
ئه‌که‌ن ته‌مسیلی لێوی له‌عل و کوڵمی ئاڵ و ڕه‌نگینت
که ناوت دێنمه سه‌ر لێوه‌کانم ئێسته ئه‌ی جانا
ده‌م و لێوم ئه‌چه‌سپێن پێکه‌وه بۆ لێوی شیرینت
به‌خه‌نده‌ی نازه‌وه فه‌رمووی ئیتر بۆت فه‌خره تۆ مردن
که ئه‌مڕۆ من به ناز و له‌نجه‌وه هاتوومه بالینت
له سایه‌ی ماچی لێوی ئه‌و شکا بازاڕی تۆ قه‌نناد
به پولێ ناکڕێ که‌س ئێسته باری شه‌هد و هه‌نگوینت
