ئەو کەسەی بانگەواز ئەکا بۆ لای خوا لە سەریەتی خۆی بڕازێنێتەوە بە ڕەوشتی جوان و نەرم و نیان بێ لە قسەو ڕەفتاریا چونکە ئەوە هۆیەکە بۆ وەرگرتنی بانگەوازەکەی وە گوێ ڕاگرتنی خەڵک لێی ، وە ئەوەش ڕەوشتی پێغەمبەران بووە علیهم الصلاة والسلام خوای بەرز بە خاتەمی پێغەمبەران صلى الله علیه وعلى اله وسلم ئەفەرموێ : [فَبِمَا رَحْمَةٍ مِّنَ اللّهِ لِنتَ لَهُمْ وَلَوْ كُنتَ فَظّاً غَلِيظَ الْقَلْبِ لاَنفَضُّواْ مِنْ حَوْلِكَ] (ال عمران : 159) واتە : (بە ڕەحمەت لە لایەن خواوە تۆ بۆیان نەرم و نیان بویتە ئەگەر تۆ تووڕەو توندو دڵ ڕەق بویتایە ئەوە دەورتیان چۆل ئەکرد لەگەڵت نەئەمان) .
وە خوای بەرز ئەفەرموێ : [وَإِنَّكَ لَعَلى خُلُقٍ عَظِيمٍ] (القلم : 4) واتە : (وە تۆ لەسەر ڕەوشتێکی بەرزی).
وە خوای بەرز کە موسای علیه الصلاة والسلام نارد بۆ لای گەورەترین تاوان باری ئەو سەردەمە کە مل هوڕیەکەی لە سنور نەمابوو بانگەشەی ئەوەی ئەکرد کە خوایەو خەڵک ئەبێ بیپەرستن پەنا بە خوا، ئەو تاغوتەش فیرعەون بوو، بەڵام خوای بەرز فەرمانی کرد بە پێغەمبەرەکەی : [فَقُولَا لَهُ قَوْلاً لَّيِّناً لَّعَلَّهُ يَتَذَكَّرُ أَوْ يَخْشَى] (طه : 44) واتە : ( قسەی نەرم لەگەڵی بکەن بەڵکو بیر بکاتەوەو بترسێ لە خوا ) .
وە خوای بەرز ئەفەرموێ : [ادْعُ إِلَى سَبِيلِ رَبِّكَ بِالْحِكْمَةِ وَالْمَوْعِظَةِ الْحَسَنَةِ وَجَادِلْهُمْ بِالَّتِي هِيَ أَحْسَنُ] (النحل : 125) واتە : ( بانگەواز بکە بۆ لای ڕێگای پەروەردگارت بە حیکمەت -بە زانست و نەرمو نیانی و کار بەجێیی بەوەی هەر شتەو لە شوێنی خۆی باس بکەی- وە بە ئامۆژگاری چاک -بە خوا بیانترسێنەو باسی پاداشت و سزای خوایان بۆ بکە- وە بە چاکترین شێوە حیوارو موناقەشەیان لە گەڵ بکە -بۆ ڕەواندنەوەی گومانەکانیان- ) .
وە پێغەمبەری خوا صلى الله علیه وعلى اله وسلم ئەفەرموێ : (فإن الرفق لم يكن في شيء قط إلا زانه ، ولا نزع من شيء قط إلا شانه) -سلسلة الاحاديث الصحيحة : 524-واتە : (وە نەرم و نیانی لە شتێک نابێ قەت ئیللا جوانی ئەکات، وە لە هەرشتێکا نەمێنێ ئیللا ناشیرنی ئەکات).