بەجێ نایێ، دەبێ ڕووکەینه سارا
حەقی ئادابی مەجنوونی له شارا

محوی بۆ سارا هەڵدەبژێرێت ؟؟ ئەو هێزە چیە وادەکات سارا لەشار شیاوتربێت بۆ شێتی ؟ ئەو سارایەی محوی هەمان ئەو سارایە کە ئێمە دەتوانین بچین بۆی ؟
یاخود ساراکەی ناو رۆحی محوی خۆیەتی ؟؟

سارا هێمایه بۆ سروشت و گەڕانەوە بۆ باوەشی دایکی یەکەم و شاریش هێمایه بۆ سروشتی دەستکردو له ناوبردنی ئارامی و جوانی لادێکان و قەرەباڵغی و نەبوونی تەنهایی و سکون ، هەر ئەمەیه ڕەمزو ڕازی خەلوەتی سۆفییەکان و تەنها نشینی عارفەکان و ناپەیوەست بوونی شێتەکان ..

لەوشوێنەی ئەقڵ دەسەڵاتی بەسەر لەشا هەیه ، قەره قۆزەکانی شێتی ناتوانن یاری بکەن ،سنورەکانی ئەقڵ ڕێ نادەن مرۆڤ لەسەر شەقام بخەوێت ،ڕێ نادەن مرۆڤ ڕۆژێک تا ئێواره درۆ نەکات ، ڕێ ناوەن ساتێک منداڵی ڕۆح یاری به گڵ و بەردی لەش بکات و بێ هیچ فیز و هۆکارێک بیخاته سەما . ئەقڵ سومبولی شارەو شار شێتی قبوڵ ناکا ، سارا سومبولی هیچەو هیچیش هیچ نیه تا شتێک وەربگرێت یا ڕەت بکاتەوه . شار حوکم دەدات ،سارا بێ دەنگه .شار سنوری هەیەو کۆڵان و ژوورو سوچی هەیه ، سارا سارایه ، بێ سنورو بێ ڕێوڕەسم و بێ سلوک و بێ سوچه ،ئەگەر سارا سلوکێکی هەبێ ئەوه بێ سلوکییه . بۆیه مەحوی له شار بێزارەو بۆ گەشتن به مەجنوون و ئەدای شێتی ڕوو دەکاته سارا . شێتەکانی شار دەیانەوێت لەوان بچیت ،وەک و ئەوان شێت بیت .شێتی مۆدێلی نییه ،شێتی ئەوپەڕی ئازادییه ،مەحوی له شێتی شار بێزارەو وەڕسه له مۆدێل ،ئەو به شوێن ئازادییەوەیه .
لە هەر جێیەک هەڵێ خورشیدی عیشقی گوڵ ڕوخان مەحوی
ئەگەر ئەقڵی ببێ ،لەو جێگه ئاونگی ئەقڵ چ بکا ؟
گەیشتن بەوپەڕی سادەیی و شێتی و دەشتەکی بوون و ڕزگار بوون له مۆدێلەکانی مۆدێل ،پەیمانی مەحوییه لەم دێڕه شیعرەدا ...