لەژێر ئەو ئاسمانە ھیچی نوێ نییە جگە لەوەی ڕۆژێك دێت، كەسێك پەیدا ببێت، باوەش لەخۆی و باوەشی قبوڵبوونت لەھەموو ڕابردووە لەمانگ چووەكەی بدەی. ئەو ڕۆژە، لەڕۆژە دووبارە بووەكانی تر ناچێ، كە دەیبینی كات دەوەستێ، دڵ باری نالەباری بەیان دەكا، دەبیتە بێ ئۆقرەترین بەشەری دنیا، ئیدی سەر بەم دنیایە نامێنی، چیدی لایەنە ڕەشەكەی ژیان نابینی، ھێشتا كەس بەتەكتەوە نییە كەچی تەنیا بوونیشت دەبێتە وەھم. دوای ئەو ڕۆژە ھەرگیز ڕۆژێكی وا دووبارە نابێتەوە، دوای ئەو ڕۆژە ئیدی مرۆڤەكەی جاران نیت. كە لێی دوور دەكەویتەوە ھەمووان جەستەیەكی وشكی بێ گیان دەبینن، گیانێك بووە بەچەتری سەری دڵبەر، ئەوسایە ڕووپۆشی دڵت دەبێتە شوشە، ھەمووان ئاسان تۆیان بۆ دەخوێندرێتەوە كە یەك دەردت ھەیە. بەڵێ لەژێر ئەو ئاسمانە ھیچی نوێ نییە جگە لە ھاتنی ئەو ڕۆژە نوێیە نامۆیە بەھەموو تەمەن!

سەرھەنگ موحسین
٢٠١٩/٠٩/٢٥، ھەولێر