بابه‌ت: < كێوی بووم، تۆ كه‌ویت كردم >
[size=24]< كێوی بووم، تۆ كه‌ویت كردم >[/size]
ئازادی شتێك نییه، بتوانین له ده‌ره‌وه
بیهێنین، ئه‌گه‌ر هه‌بێت له ناخی خۆماندایه. (غه‌سسان كه‌نافی)
غه‌سسان كه‌نافی پیاوێك بوو، پاك، نه
سامان توانی پیسی بكات، نه ده‌سه‌ڵات. (غاده سه‌ممان)
** ئه‌گه‌ر پێت وایه بزربوونی من، شتێك ده‌گۆڕێت و ده‌بێته هه‌وێنی
به‌ختیاریت، هێنده‌م خۆش ده‌وێیت، ده‌توانم به‌و شێوه‌یه‌ی ده‌خوازیت، له‌به‌ر
چاوت بزر بم. بۆ هه‌ر كوێیه‌ك سه‌فه‌ر ده‌كه‌یت، هه‌ر چه‌ند لێم دوور بیت،
له‌به‌ر چاوم بزر نابیت. دووری و دابڕان، ناتوانن ئه‌و شته هاوبه‌شانه‌ی
نێوانمان كه له‌سه‌ر بناغه‌ی ڕاستگۆیی و جوانی ڕۆ نراون، بڕووخێنن. ته‌نیا
تاقه ژنێك، ته‌مه‌نی پیاوێك داگیر ده‌كات، ئیدی هه‌ر ژنێكی دیكه
بناسێت، هه‌وڵدانه بۆ قه‌ره‌بووكردنه‌وه و له‌بیرچوونه‌وه‌ی ئه‌و تاقه ژنه و
دوای ئه‌و ئه‌وینه ڕاسته‌قینه‌یه، نه ژیان جێی به‌ختیارییه‌كی دیكه‌ی تێدا
ده‌بێته‌وه و نه‌ته‌مه‌ن به‌شی ئه‌وینێكی دیكه ده‌كات، تۆ ئه‌و تاقه ژنه‌ی
ژیان و ته‌مه‌نی منیت.
هه‌رگیز كه‌سی وه‌ك تۆم نه‌ناسیوه، هێنده لێته‌وه نزیكم، قه‌ت له كه‌سی
دیكه‌وه، هێنده نزیك نه‌بووم. ددانی پێدا ده‌نێم، من كێویی بووم، ئه‌وه تۆ
بوویت، كه‌ویت كردم، تۆ ئه‌گه‌رچی به‌رده‌وام گه‌مارۆت داوم، وه‌لێ من
هه‌میشه چاوه‌ڕێتم، هه‌ر وه‌ك كه‌سێك چاوه‌ڕێی گه‌ڕانه‌وه‌ی نیشتمانێك
بكات كه له مێژ بێت له كیسی چووبێت. له دووریت، مۆمێكم، دڵۆپ
دڵۆپ ده‌توێمه‌وه، وه‌ك چۆن ناوی خۆمم له‌بیر ناچێته‌وه، هه‌رگیز تۆیش
فه‌رامۆش ناكه‌م، ئه‌و ڕۆژه‌ی تۆم بیر بچێت، وه‌ك ئه‌وه وایه نیشتمانم له
كیس چووبێت. وه‌ك چۆن ده‌ستبه‌رداری ووڵاته‌كه‌م نابم، هه‌ر وایش قه‌ت
واز له تۆ ناهێنم و خه‌باتی بێ وچانی درێژخایه‌نم، له پێناوی ئه‌وه‌دایه به
تۆ بگه‌م، ئاخر تۆ، ڕابردوو، ئێستا و ئاینده‌ی منیت، ئاخر تۆ نیشتمانی
منیت، به هۆی تۆوه، وابه‌سته‌ی نیشتمانم.
تۆ ته‌نیا بیر له چاره‌نوسی خودی خۆت ده‌كه‌یه‌وه و من خه‌یاڵم لای
ئاینده كه‌سانی دیكه‌شه. ترسنوك نیم، ئه‌وه ئه‌مه‌ك و قوربانیدانه بۆ
كه‌سانی دیكه، تۆ به ترسنۆكیی لێك ده‌ده‌یه‌وه. وا هه‌ست ده‌كه‌م له
ناوه‌ندی خمخۆركێكدام،(1) نازانم بگه‌ڕێمه‌وه دواوه باشه؟ یان به‌ره‌و
پێشه‌وه هه‌نگاو بنێم؟ من دیلی ده‌ستی ئه‌وینی تۆم و تۆیش وه‌ك
چۆله‌كه‌یه‌كی ئازاد، به‌رده‌وام له ئاسمانی خه‌یاڵمدا له شه‌ققه‌ی باڵ
ده‌ده‌یت.
با لێشم نه‌پرسیته‌وه، وه‌لێ من هه‌میشه دێمه‌وه بۆ لات، وه‌ك ئه‌و
منداڵه بێكه‌س و بێ داڵده‌یه‌ی بۆ تاقه په‌ناكه‌ی ده‌گه‌ڕێته‌وه. وه‌ك
منداڵێكی چه‌قاوه‌سوو ده‌گه‌ڕێمه‌وه بۆ لات و سه‌ری ته‌ڕبوومت پێ
ده‌سپێرم، به‌و ئومێده‌ی قژم له ئامێزتا وشك بكه‌یته‌وه.
تۆ له منداڵدانی (با)دا له دایك بوویت و من ده‌خوازم له‌ژێر كه‌پری
پێڵومدا بتخه‌وێنم، ئه‌ی ئه‌و هه‌وره‌ژنه‌ی له ته‌مه‌نی وشكهه‌ڵاتوومدا،
به‌فڕترین وه‌رز بوویت. ئه‌وه‌نده‌م خۆش ده‌وێیت، تا لێواری شێتی،
شێتییه‌ك هێدی هێدی به‌ره‌و مردنم ده‌بات و كه‌چی چێژی لێ وه‌رده‌گرم.
ده‌شێت ڕۆژێك به ته‌واوی فه‌رامۆشم بكه‌یت، ده‌زانیت به‌و چاره‌نوسه
خه‌مناكه‌ش، هه‌ر قایلم!(2)
17\5\2007
________________
** ل121، ت.ز
(1) الرمال المتحركه.
(2) ئه‌م نامه‌یه، له‌به‌ر ڕۆشنایی ئه‌و نامانه‌ی غه‌سسان كه‌نافیدا نوسراوه كه بۆ
غاده سه‌ممانی هه‌ناردوون. (رسائل غسان كنفاني الي غادة السمان, قدمت لها:
غادة السمان, الطبعة الخامسة, دار الطليعة 2005 بيروت.)
مافی ئه‌م بابه‌ته پارێزراوه بۆ YSM21.net
