چۆن دڵت هات جێم بهێڵی
من کێم هه‌بوو له‌ تۆ زیاتر؟
له‌ دووری تۆ وا هه‌ست ده‌که‌م
که‌س نییه‌ له‌ من ته‌نیاتر.

ئه‌وه‌نده‌ بۆ من پێویست بووی
وه‌ک هه‌ناسه‌م، وه‌کوو گیانم،
له‌وساکه‌وه‌ به‌جێت هێشتووم
به‌های نه‌ماوه‌ ژیانم.

خۆ من هه‌ستم به‌رانبه‌رت
وه‌کوو کڵپه‌ی ئاگر وابوو،
خۆ من چی سۆزم شک ده‌برد،
هه‌موویم هه‌ر به‌ تۆ دابوو.

چۆن دڵت هات جێم بهێڵی
من کێم هه‌بوو له‌ تۆ زیاتر؟
ئێستا بێ تۆ که‌سێ نییه‌
به‌ختی له‌ هی من سییاتر.

وه‌ک ساوا چۆن هه‌ر ئامێزی
گه‌رمی دایکی خۆی پێ خۆشه‌،
ڕۆحی داگیرساوی منیش
ته‌نیا  بۆ تۆ به‌ په‌رۆشه‌.

حه‌مه‌سه‌عید حه‌سه‌ن