[center]هاتن بۆ هه‌مووان نییه‌!

[size=24]تۆ بۆت هه‌یه‌ بێیت
مناڵانی کۆڵان بۆیان هه‌یه‌ بێن
موسافیره‌ غه‌مگینه‌کان
عاشقانی پێکراو
پۆسته‌چییه نیگه‌رانه‌کان‌ و
پیره‌مێرده‌ ده‌سفرۆشه زویره‌‌کانیش
بێن
هاتن بۆ هه‌مووان نییه‌
به‌ڵام تۆ بۆت هه‌یه‌ بێیت و
تار‌ژه‌ن و غه‌مژه‌ن و ده‌فژه‌نه‌کان
باغه‌وانانی ته‌نیای باخه‌ دووره‌کان‌ و
په‌ڕه‌سێلکه‌ ته‌ڕه‌کانیش له‌ گه‌ڵت بێن
تۆ بۆت هه‌یه‌ بێیت و
کۆتر و په‌پووله‌ و شه‌مشه‌مه‌ وردبینه‌کان
له‌قله‌قه‌ حه‌کیم و زیکزیکه‌ قسه‌ زله‌کان
هه‌ر هه‌موو هه‌ژدیها و فیل و نه‌هه‌نگ و تیمساحه‌کان
هه‌ر هه‌موو مێرووله‌ و هه‌نگ و کرم و
خاڵخاڵۆکه‌کانیش با بێن
هاتن بۆ هه‌مووان نییه‌
به‌ڵام تۆ بۆت هه‌یه‌ بێیت
به‌یانییه‌ک زوو ده‌ڕۆم
به‌ جانتایه‌که‌وه‌
له‌ چایخانه‌که‌ی گه‌راج داده‌نیشم
چاوه‌ڕێتان ده‌که‌م بێن و
هه‌ر هه‌موو پێکه‌وه‌ بڕۆین!

هاتن بۆ هه‌مووان نییه‌
به‌ڵام تۆ بۆت هه‌یه‌ بێیت
پاشا و سوڵتان و ئه‌میر و بارۆن و
ژه‌نه‌راڵه‌کان بۆیان نییه‌ بێن
زاهید و شاعیر و قه‌دیس و گه‌ڕیده‌
برینداره‌کان دێن
هاتن بۆ هه‌مووان نییه‌
به‌ڵام تۆ بۆت هه‌یه‌ بێیت و
خودا و نیشتمان
وێنه‌ ڕه‌ش و سپییه‌ غه‌مگینه‌کانی دڵشکان و
هه‌ر هه‌موو کوژران و ره‌قبوونه‌وه‌کان
له‌گه‌ڵت بێن
تۆ بۆت هه‌یه‌ بێیت و
با ماڵه‌باجێنه‌کانی کچێنیی
مسۆده‌ی راڕای نامه‌کان و
هه‌ر هه‌موو راوه‌ستانی پڕ له‌ دڵه‌خورپه‌ی
ئه‌مدیو ده‌رگه‌ی حه‌وشه‌کانیش له‌گه‌ڵت بێن
ئێواره‌یه‌کی دره‌نگ جانتا ده‌پێچمه‌وه‌ و
ده‌ڕۆم
له‌ به‌نده‌رێکی غه‌ریب
له‌ دوای به‌له‌مێکی بچکۆله‌دا داده‌نیشم و
چاوه‌ڕێتان ده‌که‌م هه‌ر هه‌موو بێن!

هاتن بۆ هه‌مووان نییه‌
به‌ڵام تۆ بۆت هه‌یه‌ بێیت
مانگ بۆی هه‌یه‌ بێت
با و باران و به‌فر و هه‌تاو
رووناکی و تاریکیی
ئومێد و نائومێدیی
چه‌پ و راست
ئاگر و ئاو و
وه‌رزه‌کان وه‌ک چوار مناڵی ئاقڵی
ده‌ستوپل بۆیاویی
یه‌ک له‌دوای یه‌ک
به‌ ڕیز بێن
شه‌وێک که‌ که‌س به‌ ده‌ره‌وه‌ نییه‌
ده‌چم بۆ سه‌فه‌ر
به‌ جانتایه‌که‌وه‌ له‌ وێستگه‌یه‌کی غه‌مگینی قه‌تار
به‌ ته‌نیا له‌سه‌ر سه‌کۆیه‌ک داده‌نیشم
چاوه‌ڕێتان ده‌که‌م بێن و
هه‌ر هه‌موو پێکه‌وه‌ بڕۆین!
[/size]

( دلاوەر قەرەداغی )
ئایاری 2011
سلێمانی[/center]