چاوه‌كانت وه‌ك خۆم له‌ رۆحم شیرینترن
وه‌كو نیشتیمانیش ئێجگار پیرۆزن
دوو رووباری هه‌نگوینی میهرو ئه‌ڤینن
دوو كۆتری دڵ پر له‌ تاسه‌و عیشق و سۆزن
چاوه‌كانت به‌ قه‌د خوێن و هه‌ناسه‌
له‌ ناخی ناخما شیرین و خۆشه‌ویستن
بۆ هه‌میشه‌ روو له‌ كابه‌ی چاوی تۆمه‌و
عشقی چاوت له‌ بیناتی چاو و هه‌ستن
چاوه‌كانت خواوه‌ندی شه‌كر و شه‌ڕابن
شیله‌ی نازی مه‌ستی و شیرینی ده‌ته‌كێنن
بۆ باخووسی چاوانی تۆ هێشتا كه‌مه‌
هه‌موو سروشت سه‌ری ملكه‌چی بنوێنن
چاوه‌كانت وه‌ك نه‌سیمی شنه‌ی شه‌ماڵ
ته‌زووی ته‌نهایی بۆ رۆحی شێتم دێنن
جاران چاوه‌كانت پر له‌نازی كوشتن بوون
ئێستا به‌سۆزو تاسه‌وه‌ من ده‌دوێنن
چی له‌ چاوت كه‌م زێی خواوه‌ند و شیعره‌و
مرواری قه‌ده‌ری خۆمی تیا ئه‌بینم
چاوه‌كانت فیرده‌وسی پڕ ئاسووده‌گین
له‌ چاوه‌كانت هه‌لمگره‌ خاتوو زینم
هه‌تا ده‌مرم روو له‌ چاوانی تۆ ده‌بم
چاوه‌كانت ده‌كه‌مه‌ دوا زێدی ژینم...

نێ/ژیلیا ساهر